Maqedonia e Veriut sot shënon 28 vjetorin e ditës së pavarësisë

Maqedonia e Veriut sot shënon 28 vjetorin e referendumit të suksesshëm të vitit 1991, në të cilin qytetarët e Maqedonisë e shpallën veten të pavarur dhe sovran. Në referendum, mbi 95% të qytetarëve që dolën të votojnë pozitivisht u përgjigjën në pyetjen “A jeni për një Maqedoni të pavarur me të drejtë të bashkohet me një aleancë të ardhshme të shteteve sovrane të Jugosllavisë”.

Më parë, më 25 janar 1991, Kuvendi i parë shumëpartiak i Maqedonisë miratoi Deklaratën e Pavarësisë. Vullneti i njerëzve për një shtet të pavarur u konfirmua zyrtarisht me Deklaratën e pranimit të rezultatit të referendumit të 18 shtatorit 1991 në Kuvendin e Republikës së Maqedonisë, përcjell Telegrafi Maqedoni.

Hapi tjetër i rëndësishëm për forcimin e shtetit ishte miratimi i Kushtetutës së re më 17 nëntor 1991. Dhjetë vjet më vonë, Kushtetuta u ndryshua pas konfliktit të vitit 2001 dhe nënshkrimit të Marrëveshjes Kornizë.

Maqedonia si shtet i pavarur për herë të parë u njohë nga Republika e Bullgarisë, e ndjekur nga Turqia, Sllovenia, Kroacia, Rusia, Bosnja dhe Hercegovina.

Monetarisht, shteti u bë i pavarur duke futur denarin në 26 Prill 1992, ndërsa më pas formoi ushtrinë e saj, e cila feston ditën e saj të themelimit më 18 gusht.

Subjektiviteti ndërkombëtar i shtetit u afirmua përfundimisht me 8 Prill 1993, kur me aklamacion në Asamblenë e Përgjithshme të Kombeve të Bashkuara, Maqedonia u pranua si anëtare e plotë e 181-të e Organizatës Botërore. Për shkak të kundërshtimit dhe presionit nga Greqia, e cila nuk e pranoi emrin kushtetues të vendit, anëtarësimi në Kombet e Bashkuara ishte nën referencën e përkohshme si Ish-Republika Jugosllave e Maqedonisë.

Me ndërmjetësimin e Kombeve të Bashkuara, Shkupi dhe Athina filluan bisedimet për zgjidhjen e problemit, dhe më në fund pas dekadash bisedimesh, u nënshkrua marrëveshje në 17 qershor të vitit të kaluar në Prespë për të zgjidhur mosmarrëveshjen për emrin./Telegrafi/