Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka dënuar sot ish gjyqtaren e Krujës, Enkeleda Hoxha me 3 vite burg, nga të cilat ajo do të kryej 2 vite për shkak të gjykimit të shkurtuar.

Një vit pas arrestimit të saj, ish gjyqtarja e Krujës u arrestua në sallën e gjyqit, pasi nga përgjimet doli se lironte të dënuar nga qelia kundrejt pagesës. Ajo u shpall fajtore nga Gjykata e Posaçme për korrupsion dhe shpërdorim detyre.

GJKKO ka dënuar gjithashtu avokatin Aldo Tabaku me 4 vite burg, i cili luante rolin e sekserit për të ndikuar te gjyqtarja për të lehtësuar dhe liruar nga burgu të fortët. Për shkak të gjykimit të shkurtuar ai do të kryejë 2 vite e 8 muaj burg.

Mes të dënuarve janë edhe sekretarja e Gjykatës së Krujës, Emanuela Mallkuçi, e dënuar me 3 vite burg, nga të cilat do të kryejë 2 vite burg.

Ndërsa Saimir Petani dhe Bledar Petani janë dënuar secili me 2 vite e 6 muaj burg nga të cilat do të kryejnë 1 vit e 8 muaj burg. Ata ishin të afërmit e të dënuarit që kishin futur avokatin mik tek gjyqtarja për ta liruar nga burgu.

Enkeleda Hoxha u shkarkua nga detyra e gjyqtares më 17 mars të vitit të kaluar dhe u la në burg nga Gjykata e Apelit.

Ajo u arrestua nga Prokuroria e Posaçme SPAK në shkurt të vitit 2021 pas një operacioni të bërë në Gjykatën e Krujës, në seancë gjyqësore teksa po lironte një tjetër të dënuar. /Telegrafi/