Lansimi i super-veturës me katër dyer të McLaren shtyhet të paktën deri në vitin 2028

Marka britanike McLaren thotë se planifikon të zgjerojë gamen e saj të veturave elektrike – duke përfshirë një SUV dhe vetura elektrike – por kjo nuk do të ndodhë përpara vitit 2028.

Në një intervistë me Autocar, revistën britanike, gjatë fundjavës së shkuar në Festivalin e Shpejtësisë Goodwood, drejtori ekzekutiv i McLaren, Michael Leiters, deklaroi se prodhuesi i veturave momentalisht po fokusohet në vendosjen e “kompanisë në rrugën e duhur drejt përfitimit”.

Kur u pyet në lidhje me progresin e modelit të shumëpërfolur SUV, Leiters për Autocar bëri të ditur se prioritet i tij ishte një riorganizim dhe rikapitalizim i tërësishëm i kompanisë, raporton Drive, transmeton Telegrafi.

“Nëse jemi në rrugën e duhur për përfitim, do të mendojmë për shtrirje në të gjitha segmentet. Ne e quajmë atë ‘performancë të përbashkët’. Performanca e përbashkët mund të jetë gjithçka që ka më shumë se dy dyer dhe/ose më shumë se dy ulëse”, ishin fjalët e Leiters.

“Kjo është diçka për të cilën do të mendojmë më vonë. Ne nuk morëm një vendim për këtë. Është padyshim një mundësi biznesi për ne”, shtoi tutje ai.

Ndër të tjera Michael tha: “Por unë nuk e shoh këtë në të ardhmen e afërt. Nëse merrni parasysh atë që thashë – rikapitalizimin dhe më pas kalimin në përfitim plus kohën e zhvillimit të veturës – kjo nuk do të ndodhë përpara vitit 2028”. /Telegrafi/