Sekretari i Përgjithshëm i OKB-së, Antonio Guterres, ka deklaruar se në kupolën e depozitimit të mbetjeve radioaktive amerikane në Paqësor, janë vërejtur disa të çara. Gjithashtu është vërejtur se autoritet e Ishujve Marshall, nuk kanë mjetet për të parandaluar rrjedhjen e mbetjeve radioaktive në oqean, raporton New York Post.

Sipas Guterres, mbetjet radioaktive nga testet bërthamore që Shtetet e Bashkuara i kryen gjatë Luftës së Ftohtë mund të përfundojnë në ujërat e Paqësorit, pasi kupola e betonit ka pësuar çarje brenda të cilës ishin varrosur këto mbetje, transmeton Telegrafi.

“Të gjithë e dimë se Paqësori është bërë vend i testimit të armëve bërthamore. Pasojat e këtyre testeve kanë qenë shumë dramatike sa i përket shëndetit të njeriut dhe helmimit të ujërave detare në disa zona”, ka shtuar Guterres.

Gjatë periudhës 1946-1958, në Paqësor janë kryer 67 testime të armëve bërthamore nga Shtetet e Bashkuara, qoftë nga ajri, toka dhe në ujë. E pas presionit të madh ndërkombëtar Washingtoni ishte detyruar të ndalë këto testime.

Më 1 mars të vitit 1954 ishte testuar edhe bomba me hidrogjen e njohur si “Bravo”, që ishte njëmijë herë më e fuqishme sesa bomba që ishte hedhur dhe shpërthyer në Hiroshima të Japonisë.

E për shkak të vlerësimeve të gabuara të shkencëtarëve amerikanë, shpërthimi “Casttle Braco” ka qenë 2,5 herë më e madhe sesa që ishte pritur. Si pasojë e kësaj, më shumë se 11 mijë kilometra katrorë e zonës përreth ku kishte ndodhur shpërthimi është mbuluar me hirin radioaktiv.

“Disa orë më vonë hapësira ishte mbuluar me një lloj hiri me ngjyrë të bardhë. Askush nuk e dinte se ishte mbetje radioaktive”, pati deklaruar ministri i Shëndetësisë së Ishujve Marshalla, Kalan Kaneko.

E gjatë një vizite të realizuar së fundmi në këtë ishull në Paqësor, Guterres kishte vërejtur se në rast të ndonjë stuhie tropikale në sarkofagun e ishullit Runit, ku Shtetet e Bashkuara “hodhën” mbetjet e “Casttle Bravo”, mund të shkatërrojnë bunkerin e betonit brenda të cilit janë varrosur mbetjet.

“Së fundmi kam pasur takim me presidentin e Ishujve Marshall, Hild Hajni. Ai është shumë i brengosur nga mundësia e rrjedhjes së mbetjeve radioaktive që është groposur në sarkofagun bërthamor në atë zonë”, ka shtuar Guterres.

Ekspertët pretendojnë se duke marrë parasysh që vetëm kupola është nga betoni e muret dhe pjesa e poshtme nga dheu, pa dyshim se uji i detit tashmë ka depërtuar brenda. E në këtë rast, shkatërrimi i kulmit të betonit vetëm sa do ta përkeqësoj situatën e krijuar. /Telegrafi/