​Kuçi e Janova arsyetojnë licencimin e hidrocentraleve të Kelkosit, thonë se nuk pati ndërhyrje politike

Ministri i Ekonomisë dhe Ambientit, Blerim Kuçi dhe kryesuesi i Bordit të ZRRE-së, Arsim Janova kanë arsyetuar lëshimin e licencave të operimit afatgjatë për dy hidrocentralet e Kelkosit.

Pavarësisht se u adresuan kritika nga deputetët në Komisionin Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve, dy zyrtarët institucional këtë veprim thanë se e kanë marrë bazuar në ligje dhe se nuk kanë pasur ndërhyrje politike.

Kuçi tha se ai nuk është involvuar në këtë proces, por sipas tij nuk ka ndonjë indikacion që është shkelur ligji.

“Ministri nuk është involvuar në këtë nënshkrim, nuk ka asnjë indikacion që në këtë proces është shkel ligji. Ndikimet e mia kanë qenë vetëm zbatim i ligjeve në fuqi dhe kam pas kërkesë që ato të zbatohen në përpikëri”, tha ai.

Ndërsa, Janova tha se lejet afatgjate iu kanë dhënë pasi i kanë plotësuar kriteret.

“Leja mjedisore qenë nga ministria që ka qenë kusht i vetëm, dhe gjithçka dokumentet tjera i kanë plotësuar të gjitha kushtet për licenca afatgjate”, tha ai.

Por anëtari i komisionit nga radhët e LDK-së, Haxhi Avdyli tha se me këtë vendim ZRRE-ja i ka dhënë goditje punës së Kuvendit. /KP/