MOST: KSHZ-ja të deklarohet nëse mund të ketë zgjedhje të besueshme

Në konferencën për shtyp, shoqata qytetare Most, njoftoi se janë regjistruar një numër shkeljesh parazgjedhore nga 17 shkurti e deri më 3 prill, transmeton Telegrafi Maqedoni.

Sipas tyre, ka patur përgatitje të listave të votuesve të mundshëm për VMRO-DPMNE-në në administratë, nuk është respektuar parimi i ndarjes së shtetit dhe partisë gjatë adresimit të funksionarëve shtetërorë, përdorim i veturave shtetërore për qëllime partiake, si edhe trysni mbi të punësuarit në administratë për të ndjekur aktivitete partiake të partisë në pushtet.

Në lidhje me verifikimin në terren, Darko Aleksov nga Most thotë se rrethanat se si është zbatuar ky verifikim nuk janë në krah të konstatimit efikas dhe efektiv të së vërtetës, si edhe mosbesim në proces, duke e ftuar KSHZ-në që të dalë me deklaratë zyrtare nëse mund të garantojë zgjedhje të besueshme.

Në këtë konferencë të shoqatës Most, ishin të pranishëm edhe ambasadori amerikan, Jess Baily, ai evropian, Aivo Orav, ambasadori britanez, Charles Garrett, si edhe përfaqësues të OSBE/ODIHR-it./Telegrafi/