Kryeministri uron gratë

Kryeministri i Kosovës, Isa Mustafa përmes një publikimi në rrjetin social Facebook ka uruar 8 Marsin, Ditën e Gruas.

Në shkrimin e tij gratë quhen simbol i jetës, i qytetërimit, zhvillimit dhe civilizimit të vendit.

Në urimin e tij Kryeministri shkruan po ashtu se gratë janë simbol i emancipimit, i një fryme të re në çdo sferë të jetës.

Lexojeni të plotë shkrimin e kryeministrit Mustafa

Gra të nderuara,

Sot shënojmë ditën tuaj, që jeni dhe mbeteni simbol i jetës në tërësi, simbol i qytetërimit, zhvillimit dhe civilizimit të vendit.

Ju uroj për këtë ditë simbolike! Çdo ditë është ditë e juaja.

Thuhet me arsye se zhvillimi i gruas përcakton zhvillimin e një kombi. Në vendin tonë, ju jeni simbol i emancipimit, i një fryme të re, jo vetëm brenda familjes, por kudo në shoqëri, në drejtimin dhe organizimin e shtetit, në arsim, ekonomi, në art dhe kulturë.

Shumë gra u flijuan për idealin e lirisë. Për to, në shenjë nderimi sot së bashku do të vejmë lule te Memoriali Heroinat në Prishtinë. /Telegrafi/