Kryeministri britanik thotë se Rusia duhet “t’i japë fund luftës barbare” ndërsa përballet me zyrtarët e Putinit në G20

Rishi Sunak ka thënë se Rusia duhet “të dalë nga Ukraina dhe t’i japë fund kësaj lufte barbare” teksa u përball me zyrtarët e Vladimir Putinin në samitin e G20.

Kryeministri britanik i bëri komentet në seancën e parë të së martës, teksa kritikoi mungesën e presidentit rus në bisedimet në ishullin indonezian të Balit, shkruajnë mediat britanike, përcjell Telegrafi.

“Është e dukshme që Putini nuk u ndje në gjendje të bashkohej me ne këtu”, tha ai. “Ndoshta nëse do të kishte qenë, ne mund të vazhdonim me rregullimin e gjërave”.

“Sepse ndryshimi i vetëm më i madh që dikush mund të bëjë është që Rusia të largohet nga Ukraina dhe t’i japë fund kësaj lufte barbare”.

“Britania e Bashkuar e kundërshton këtë agresion. Ne do ta mbështesim Ukrainën për aq kohë sa të jetë e nevojshme”.

Putin zgjodhi të mos marrë pjesë në bisedime me vëzhguesit që thonë se zyrtarët po kërkojnë ta mbrojnë atë nga “dënimi” nga liderët botërorë.

Sunak qortoi gjithashtu Rusinë duke thënë se “vendet nuk duhet të pushtojnë fqinjët e tyre”.

Kryeministri britanik u gjend bashkë me liderët e 19 ekonomive më të mëdha në botë në Bali – takimi i parë në historinë 15-vjeçare të grupit që do të mbahet nën hijen e një lufte të madhe evropiane të nxitur nga një prej anëtarëve të tij. /Telegrafi/