KRU ‘Prishtina’ paralajmëron dy aksione për shkyçje, fton policinë t’i ndihmojë

Kompania Rajonale e Ujësjellësit “Prishtina” njofton se do të intensifikoj shkyçjet nga shërbimet e ujësjellësit në të gjitha kategoritë e konsumatorëve.

Sipas KRU-së, kjo po bëhet për shkak të mospagesave për shërbimet e ujësjellësit pasi borxhet ndaj shërbimeve të ujit janë mbi 45 milion euro.

“KRU-ja nga dita e nesërme do të intensifikoj shkyçjet nga shërbimet e ujësjellësit në të gjitha kategoritë e konsumatorëve, për shkak të mospagesave për shërbimet e ujësjellësit kur dihet tashmë që borxhet ndaj shërbimeve të ujit janë mbi 45 milionë euro. Por jo vetëm, ngase nesër do i realizojmë dy shkyçje të mëdha, për arsye të tjera, për të cilat do njoftoheni”, thuhet në njoftim.

“Për shkak që mund të hasim në rezistencë për arsye se janë me ndjeshmëri më të madhe dhe më specifike, kemi ftuar edhe Policinë e Kosovës të asistoj në këtë proces jo të dëshirueshëm për ne, por kjo do bëhet pas shumë vërejtjeve tona që u kemi adresuar dy konsumatorëve të mëdhenj”, përfundon KRU-ja. /Telegrafi/