Kryetari i Bordit të Odës së Afarizmit të Kosovës, Skënder Krasniqi në një intervistë për Telegrafin, ka thënë se Kosova duhet ta rinegocioj Marrëveshjen e CEFTA-së.

Krasniqi ka thënë se Kosova duhet të aplikoj si shtet.

“Fatkeqësisht Kosova prej momentit të nënshkrimit të CEFTA-së në vitin 2006 nga ana e Qeverisë së Kosovës, kjo Marrëveshje ka qenë një pengesë e jashtëzakonshme e zhvillimit rajonal, ka qenë një dështim i jashtëzakonshëm i qeverisë së atëhershme për arsye se nuk e kanë nënshkruar me kushte dhe mbrojtje të produkteve siç i kanë mbrojtur shumica e vendeve, ku të gjitha produktet që kanë hyrë në Kosovë kanë pasur taksën zero”, tha Krasniqi.

Ai shtoi se Kosova nga CEFTA duhet të largohet si UNMIK dhe të aplikoj si shtet.

Krasniqi: Taksa për prodhimet e Serbisë të kthehet në reciprocitet (Video) Krasniqi: Taksa për prodhimet e Serbisë të kthehet në reciprocitet (Video)

“Ne nga fillimi kemi kërkuar që Kosova të dal nga CEFTA si UNMIK, sepse në vitin 2008 na e kemi shpallur pavarësinë dhe jemi shtet sovran. Ne nuk guxojmë të përfaqësohemi në asnjë institucion ndërkombëtar si UNMIK apo si një shtet tjetër dhe kjo është në kundërshtim me Kushtetutën e Kosovës. Ne kemi kërkuar që të shfrytëzohet kjo mundësi që Kosova ta njoftoj CEFTA-në e të largohet si UNMIK dhe të aplikon si republikë e Kosovës”, ka shtuar ai.

Krasniqi ka folur për problemet me të cilat përballet sektori privat në vend si dhe për lehtësirat që duhet krijuar bizneseve për të rritur numrin e të të punësuarve dhe për taksën prej 100 për qind për produktet nga Serbia dhe Bosnja e Hercegovina. /Telegrafi/