Kongresi Panshqiptar Amerikan zgjedh kryesinë e re

Kongresi Panshqiptar Amerikan (KPA), ka mbajtur Kuvendin e tij ku ka zgjedhur Bordin e ri të Drejtorëve. 

Pjesëmarrësit u pajtuan njëzëri të caktojnë: Kryetar Sulejman Çelaj, nënkryetarë Eglantina Kica dhe Uk Lushi, dhe Sekretar Bleron Baraliu.

“Udhëheqësia e re e KPA-së është e ngazëllyer dhe vendosur të  vazhdojë përparimin e misionit të organizatës dhe të punojë në forcimin e mëtutjeshëm të lidhjes së veçantë mes SHBA-së dhe shqiptarëve”, thuhet në njoftimin për media të KPA-së.

“KPA dhe komuniteti shqiptaro-amerikan në rritje janë të vetëdijshëm për sfidat e shumta me të cilat ballafaqohen shqiptarët në Ballkan.  Kjo është arsyeja për komunitetin dhe të gjithë shqiptarët të bashkohemi.  Unë jam i bindur që drejtorët dhe anëtarët e KPA-së do të bëjnë më të mirën e mundshme duke avokuar për shqiptarët kudo që jemi”, ka deklaruar kryetari Çelaj.

“KPA fton të gjithë  anëtarët e komunitetit dhe miqtë amerikanë të na bashkangjiten në punën për promovimin e vlerave dhe synimeve të përbashkëta si dhe relacionin special mes kombeve amerikane dhe shqiptare.  Koha e sukseseve më të mëdha për KPA-në është para nesh. Të bashkuar jemi të fortë”.

Kongresi Panshqiptar Amerikan (KPA) është organizatë jopërfituese e komunitetit e dedikuar të promovojë interesat e përbashkëta, vlerat dhe idealet e Shteteve të Bashkuara dhe popullit shqiptar. /Telegrafi/