Teknologji Lajme Teknologji

BE kërkon përgjigje ‘urgjente’ nga TikTok për ndërhyrje të mundshme të huaja në zgjedhjet rumune

Para 1 muaji

Komisioni Evropian i ka dërguar TikTok një kërkesë “urgjente” për informacion duke kërkuar më shumë përgjigje në lidhje me rolin gjithnjë e më të diskutueshëm të platformës në raundin e parë të zgjedhjeve presidenciale të Rumanisë, i cili pa fitoren e papritur të Calin Georgescu dhe nxiti shqetësime serioze për ndërhyrje të huaja.

Georgescu, një kandidat i pavarur që ka përqafuar pikëpamjet euroskeptike, miqësore ndaj Rusisë, , do të përballet me Elena Lasconin, një liberale pro-evropiane, në raundin e dytë të planifikuar për këtë të diel.

“Ne jemi të shqetësuar rreth rritjes së indikacioneve të një operacioni të koordinuar të ndikimit të huaj në internet që synon zgjedhjet e vazhdueshme rumune, veçanërisht në TikTok”, tha Henna Virkkunen, nënkryetarja ekzekutive e Komisionit, përgjegjëse për politikën dixhitale.

Bëhet e ditur se kërkesa, e lëshuar të premten, bazohet në Aktin e Shërbimeve Dixhitale (DSA) dhe vjen me një afat prej 24 orësh.

Kjo shënon kërkesën e dytë për informacion të dërguar në TikTok në kontekstin e zgjedhjeve rumune pas asaj të parë të dërguar javën e kaluar, shkruan euronews, përcjell Telegrafi.

Brukseli dëshiron që kompania të sqarojë zbulimet e përfshira në dokumentet e inteligjencës që presidenti rumun Klaus Iohannis deklasifikoi të mërkurën, të cilat sugjeronin fuqimisht se ngritja e papritur e Georgescu nuk kishte qenë “një rezultat natyror”, por rezultat i veprimit të koordinuar artificialisht për të manipuluar dhe shfrytëzuar algoritmin e TikTok.

Fushata ka të ngjarë të jetë orkestruar nga një “aktor shtetëror”, thuhet në dokumente.

Megjithëse Rusia nuk përmendet si fajtore, agjencitë zbuluan ngjashmëri midis një fushate në internet në Rumani dhe një fushate të mëparshme që Moska kishte zhvilluar në Ukrainë.

Sipas Shërbimit të Inteligjencës Rumune (SRI), një rrjet i fshehur më parë, që operonte kryesisht në TikTok, i cili kishte qenë kryesisht “i fjetur” që nga krijimi i tij në 2016, u bë shumë aktiv në dy javë përpara raundit të parë të zgjedhjeve.

SRI raportoi gjithashtu se gati një milion euro u shpenzuan në fushatë nga një individ që mbështet kandidaturën e Georgescu, me deri në 950 euro të paguara për një ripostim.

Madje, vetë TikTok pranoi se kishte marrë 362,500 euro nga ky person.

Deklasifikimi shkaktoi valë tronditëse në Rumani dhe më gjerë, duke nxitur frikën se vendi i Evropës Lindore kishte rënë viktimë e ndërhyrjes së huaj.

TikTok nën vëzhgim

Siç raportohet, kërkesa për informacion pason “urdhrin e ruajtjes” që Brukseli shpalli të enjten, i cili detyron TikTok të “ngrijë dhe ruajë” të gjitha dokumentet dhe informacionin e brendshëm, duke përfshirë sistemin e tij të rekomandimeve dhe promovimin e përmbajtjes politike.

Urdhri do të zbatohet nga 24 nëntori 2024 deri më 31 mars 2025 dhe do të mbulojë zgjedhjet e ardhshme në Rumani, Kroaci, Austri, Greqi dhe Gjermani.