BE kërcënon Malin e Zi me ndërprerje të negociatave për anëtarësim

Bashkimi Evropian ka kërcënuar Malin e Zi se do të shqyrtojë ndërprerjen e procesit të negociatave nëse vendi nuk krijon institucione funksionale dhe nuk del nga kriza e lidhur me Gjykatën Kushtetuese.

Paralajmërimin e kanë dërguar ministrja sllovene e Punëve të Jashtme, Tanja Fajon dhe ministri austriak për Çështje Evropiane dhe Ndërkombëtare, Alexander Schallenberg, të cilët sot kanë vizituar Malin e Zi.

“Kjo është një vizitë që vjen me një paralajmërim të qartë, por edhe një inkurajim që ne e sjellim në emër të kolegëve tanë. Ne dëshirojmë që ky vend të kapërcejë krizën politike dhe bllokimin politik. Paralajmërimi është – nëse ngërçi vazhdon, Mali i Zi rrezikon të humbasë hapin tjetër në rrugën drejt BE-së dhe të përfundojmë në anën e jo në atë rrugë”, theksoi Schallenberg.

Ai vuri në dukje se Mali i Zi ka qenë një model për rajonin deri më tani, por tani mund të shohim polarizimin dhe mos përparim në çështjet kyçe të reformës, raporton rtcg.

Ministrica @tfajon v Podgorici 🇲🇪: "Danes sem tu s kolegom Schallenbergom v imenu @JosepBorrellF tudi zato, ker želimo Črni gori pomagati na njeni poti v #EU in preprečiti nadaljnji zastoj v pogajanjih. #Slovenija 🇸🇮 je s svojimi izkušnjami & znanjem vedno pripravljena pomagati." pic.twitter.com/XJdUY1mqfx

— MFEA Slovenia (@MZEZ_RS) December 21, 2022

Fajon dhe Schallenberg, pas takimit me presidentin Milo Gjukanoviq, kryeministrin Dritan Abazoviq dhe kryetaren e Kuvendit, Danijela Gjuroviq, theksuan se ngjarjet e fundit politike në Mal të Zi shkaktuan një krizë të thellë të institucioneve dhe kontribuuan në ngadalësimin e negociatave për anëtarësim.

Mali i Zi është në krizë politike që nga gushti, kur ra qeveria e Abazoviqit pas nënshkrimit të Marrëveshjes Themelore me Kishën Ortodokse Serbe. Pas kësaj, u formua një shumicë e re qeverisëse, e udhëhequr nga Fronti Demokratik pro Serb, i mbështetur nga Abazoviq, i cili propozoi Miodrag Lekiqin, ish-diplomat nga koha e Sllobodan Millosheviqit, për formimin e qeverisë së re.

Gjukanoviq refuzoi t’i jepte mandatin Lekiqit, duke pretenduar se nuk ishte i bindur që qeveria që do ta udhëhiqte kishte mbështetjen e parlamentit.

Si kundërpërgjigje, shumica në pushtet miratoi një ligj të ri për presidentin, duke e detyruar Gjukanoviqin t’ia besonte mandatin Lekiqit. Ai ligj u vlerësua si antikushtetues nga Komisioni i Venecias dhe diplomatë të bashkësisë ndërkombëtare.

Protestat masive të përkrahësve të opozitës mbahen çdo javë, të mbështetura nga presidenti Gjukanoviq, duke kërkuar tërheqjen e ligjit për presidentin dhe shpalljen e zgjedhjeve të jashtëzakonshme parlamentare. /Telegrafi/