KE: Përparimi në fushën e arsimit në Maqedoni ka qenë i ngadaltë

Në fushën e arsimit, vendi është i përgatitur mesatarisht, thuhet në raportin Komisioni Evropian për Maqedoninë e Veriut. Përparimi në zbatimin e masave të Strategjisë së Arsimit 2018-2025 ka qenë i ngadaltë dhe rekomandimet nga raporti i vitit 2019 janë përmbushur vetëm pjesërisht dhe mbeten të vlefshme, përcjell Telegrafi Maqedoni.

Progres është bërë me miratimin e ligjeve të reja për arsimin fillor dhe për mësuesit dhe bashkëpunëtorët profesionalë në shkollat ​​fillore dhe të mesme, si dhe me reformat në arsimin dhe aftësimin profesional.

Në vitin e ardhshëm, vendi duhet të angazhohet për zbatimin e kornizës së re të arsimit strategjik, veçanërisht qëllimet për arsimin parashkollor, rritjen e mbështetjes për trajnimin dhe zhvillimin profesional të mësuesve dhe sigurimin e një procesi efikas vlerësimi dhe përmirësimin e aksesit në arsimin cilësor për të gjithë, veçanërisht për fëmijët parashkollorë, fëmijët me aftësi të kufizuara dhe komunitetin rom.

Raporti thekson se sistemi arsimor është i prirur ndaj ndikimit politik dhe korrupsionit, ndarjet etnike vazhdojnë dhe pengesat për arsimin e integruar mbeten.

Aksesi në arsim të rregullt për fëmijët me aftësi të veçanta mbetet i kufizuar dhe mungon qasja në objektet shkollore, materialet adekuate të të mësuarit mungojnë dhe mbështetja e mësuesve është e pamjaftueshme. Fëmijët dhe nxënësit romë vazhdojnë të përballen me pengesa në arsimin e rregullt dhe cilësor, por që ligjet e reja parashikojnë përmirësimin e cilësisë së arsimit dhe përfshijnë masa për përfshirje më të madhe dhe forcimin e zhvillimit profesional të mësuesve./Telegrafi/