KDI dënon gjuhën denigruese dhe sulmet fizike brenda punimeve të seancës në Prizren

Instituti Demokratik i Kosovës (KDI), ka përcjellë me shqetësim punimet e seancës së Kuvendit të Komunës së Prizrenit të 31 korrikut, ku diskutimet kanë degraduar në sulme verbale dhe fizike, në mes asamblistit të Partisë Demokratike të Kosovës (PDK), Bardh Avdaj dhe kryesuesit të Kuvendit, Artan Abrashi.

Kështu thuhet në komunikatën për media të KDI-së.

“Veprimet dhe përplasjet e anëtarëve të Kuvendit të Komunës në seancën e sotme bien ndesh me vlerat dhe normat demokratike në të cilat duhet të zhvillohen punimet e Kuvendit. Angazhimi i anëtarëve të kuvendit duhet të jetë në përfaqësimin e interesave, ngritjen e çështjeve dhe shqetësimeve të qytetarëve, andaj çdo tejkalimi i këtij parimi shkel mandatin dhe përgjegjësinë e këshilltarit si përfaqësues i qytetarëve”, thuhet në këtë komunikatë.

Sipas këtij njoftimi KDI u bën thirrje anëtarëve të Kuvendit Komunal të Prizrenit të përmbahen nga gjuha denigruese, sulmet verbale dhe fizike.

“Njëkohësisht kërkon nga kryesuesi i Kuvendit të Komunës të vë në përdorim respektimin e plotë të Rregullores së punës dhe të ndërmarrë masa adekuate ndaj anëtarëve të këtij institucioni që përdorin gjuhë denigruese dhe sulme verbale dhe fizike  ndaj anëtarëve të kuvendit”, përfundon komunikata. /Telegrafi/