Emiliano Martinez ka thënë se nuk është penduar që është larguar nga Arsenali, për t’iu bashkuar rivalit nga Liga Premier, Aston Villës.
Portieri ishte pjesë e The Gunners për dhjetë vite, mirëpo asnjëherë nuk e kishte shansin që të luante si portieri i parë.
Më 16 shtator, Martinez kaloi te Aston Villa, derisa deklaroi se kalimi i tij rivali i Topçinjve është një hap para.
“Jam në formën më të mirë në karrierë dhe nuk kisha sigurinë për ndeshjet që do t’i luaja, andaj edhe nuk isha i sigurt të qëndroja”, ka thënë portieri argjentinas për largimin nga Arsenali.
“Aston Villa është një klub i madh, nuk kisha dyshime për të kaluar këtu. Të gjithë mendojnë se kam bërë një hap pas, mirëpo është një hap para në karrierë”.
“Disa persona nuk e dinë sa kam luftuar kur qëndroja në bankën rezervë dhe kisha nëntë portierë para meje. Andaj nuk pendohem që jam larguar”, ka shtuar më tej Martinez. /Telegrafi/
