Jabllanoviq flet për mundësinë e zgjedhjeve të reja në veri dhe synimin për ta larguar Listën serbe nga pushteti

Pas dorëheqjes së katër kryetarëve nga komuniteti serb në komunat në veri të vendit, më 23 prill të këtij viti u mbajtën zgjedhjet lokale.

E kandidati për kryetar i Komunës së Leposaviqit, njëherësh kryetari i Partisë së Serbëve të Kosovës, Aleksandar Jabllanoviq vetëm tri ditë para mbajtjes së këtyre zgjedhjeve u tërhoq nga gara.

Pas zgjedhjeve të prillit dhe zgjedhjes së katër kryetarëve të rinj atje, situata ka filluar të tensionohet dhe bashkësia ndërkombëtare ndër të tjera ka kërkuar që të mbahen edhe një herë zgjedhjet.

Por, a do të kandidonte sërish për kryetar të Leposaviqit, Aleksandar Jabllanoviq nëse do të mbahen zgjedhjet në veri?

Në një prononcim për Telegrafin, kryetari i Partisë së Serbëve të Kosovës ka thënë se synimi i tij si kryetar i partisë që përfaqëson është që të mposht Listën serbe si parti e cila për shumë vite me radhë ka udhëhequr me këto komuna.

“Sigurisht që ky është synimi im politik në këtë moment. Fitorja ndaj Listës Serbe ka qenë gjithmonë synim politik dhe prioritet numër një për ne dhe zgjedhjet janë një mënyrë për të arritur këtë qëllim”, ka thënë ai.

Por, siç u shpreh Jabllanoviq nëse do të mbahen zgjedhjet e parakohshme apo jo, do të varet nga disa faktorë dhe mbi të gjitha nëse situata do të jetë paqësore dhe pa tensione të mëdha dhe nëse do të kenë dialog dhe marrëdhënie konstruktive me Qeverinë e Kosovës para zgjedhjeve.

“Që nga shpallja e zgjedhjeve në nëntor 2022, ne si PKS nuk kemi pasur absolutisht asnjë kontakt me institucionet qendrore në Prishtinë. Jo sepse nuk e donim, por sepse qeveria e refuzoi atë komunikim dhe bashkëpunim. Pa bashkëpunim politik dhe komunikim të drejtpërdrejtë me Qeverinë e Kosovës, nuk besoj se janë të mundshme zgjedhjet në të cilat do të dilnin një numër i madh i qytetarëve”, u shpreh ai.

Jabllanoviq gjithashtu theksoi se “disa rrethana në veri duhet të ndryshojnë, mbi të gjitha çështja e sigurisë. Nëse do të mund të arriheshin kushte të tilla të pranueshme, do të ishim të lumtur të ishim pjesë e procesit zgjedhor. Edhe pas zgjedhjeve do të ishim një forcë politike, prioriteti kryesor i së cilës është jeta e qetë me shqiptarët dhe të gjitha komunitetet e tjera në Kosovë”. /Telegrafi/