Ish-diplomatët e Kosovës thonë se MPJD ka zhdukur nga faqja zyrtare historikun e aktiviteteve diplomatike: E papranueshme dhe joserioze

Ish-diplomatë të Kosovës janë ankuar se Ministria e Punëve të Jashtme dhe Diasporës, dikaster ky që udhëhiqet nga Donika Gërvalla, ka zhdukur nga faqja zyrtare gjithë historikun e aktiviteteve diplomatike.

Fillimisht ka qenë ish-kryediplomatja Meliza Haradinaj-Stublla e ka cila ka reaguar lidhur me këtë çështje, duke e cilësuar si veprim të papranueshëm dhe joserioz.

“E papranueshme se si Ministria e Jashtme paska zhdukur gjithë historikun e aktiviteteve diplomatike, kumtesave, takimeve, njoftimeve e qëndrimeve zyrtare nga website i MPJD-së. Madje në historikun e ish-ministrave të jashtëm figurën vetëm ish Ministri Konjufca! Sinqerisht e pakuptimtë dhe joserioze!”, ka shkruar ajo në Facebook.

E një replikë në postimin e Haradinaj-Stubllës e ka bërë ish-kryediplomati tjetër, Petrit Selimi, i cili ka thënë se nuk ka dashur ta besojë një gjë të tillë.

“O shoku Enver Hoxha u kthye nga vdekja. Nuk doja ta besoja Melisa Haradinaj-Stublla, por është e vërtetë. Me sa duket në historinë e Kosovës ky është i vetmi ish-ministër i Punëve të Jashtme”, ka shkruar ai në platformën “X”.

E ish-ambasadori i Kosovës në Bruksel, Bernard Nikaj, ka thënë se kjo është fyese për ish-ministrat e jashtëm.

“Sipas faqes së internetit të MPJD-së, në 15 vitet e pavarësisë së saj Kosova ka pasur vetëm një Ministër të Jashtëm. Kjo është jo vetëm e pavërtetë por edhe fyese për ish-ministrat e jashtëm”, ka shkruar Nikaj në platformën “X”.

According to the new webpage of @MFAKOSOVO, in its 15 years of independence #Kosovo has had only one Foreign Minister. This is not only untrue but also insulting to former Foreign Ministers @Enver_Hoxhaj @vloracitaku @pacollibehgjet @shyseni1 @Petrit @MelizaHaradinaj

— Bernard Nikaj (@nikaj) September 20, 2023

Lidhur me këtë Telegrafi ka dërguar pyetje në adresë të MPJD-së dhe është në pritje të përgjigjes. /Telegrafi/