IKSHP: Përkeqësohet cilësia e ujit të pijes

Si pasojë e reshjeve të mëdha në disa rajone të Kosovës Qendrore dhe Perëndimore, është shkaktuar ngritje e nivelit të ujit në disa lumenj të Kosovës dhe dalje nga shtrati duke shkaktuar vërshime në rrugë që po vështirëson dukshëm qarkullimin.

Instituti Kombëtar i Shëndetësisë Publike të Kosovës, përmes një njoftimi për media, thotë se vërshimet paraqesin gjendje të jashtëzakonshme ku mes tjerash, mund të përkeqësohet cilësia e ujit të papërpunuar nga të reshurat, dëmtohet sistemi i kanalizimit (largimit të ujërave të zeza), kontaminohen puset që furnizojnë territoret rurale me ujë të pijshëm dhe sistemi i përpunimit dhe furnizimit me ujë të pijshëm.

“Kur kësaj situate i shtohen edhe vërshimet nga përrenjtë dhe lumenjtë ku shtretërit e tyre janë deformuar, pas reshjeve ato fryhen dhe depërtojnë në mjediset e banuara. Në vendbanime rrjetet e kanalizimeve janë të ngufatura me mbeturina dhe qesin në sipërfaqe materie fekale që paraqesin rrezik potencial për shpërthime epidemike të sëmundjeve ngjitëse”, thotë IKSHPK.

Bazuar në rezultatet e monitorimit të ujit për pije, IKSHPK thotë se të dhënat laboratorike për parametrat bakteriologjik dhe kimik deri sot rezultojnë brenda standardeve të parapara me rregulloret për cilësinë e ujit për pije, UA 16/2012.

Megjithatë, duke patur parasysh situatën e krijuar pas vërshimeve në disa rajone të Kosovës, e sidomos pjesën qendrore, Instituti Kombëtar i Shëndetësisë Publike jep këto rekomandime:

1. Sigurimi i ujit higjienik për pije të ofrohet nga cisternat e kompanive ujore komunale deri në normalizimin e gjendjes në të gjitha fshatrat e vërshuara.

2. Furnizimi i banorëve me ujë të ambalazhuar për pije dhe përgatitje të ushqimit.

3. Uji i puseve në vendbanimet vërshuara është ndotur nga plehrat dhe materiet fekale andaj nuk mund te përdoret si i tillë për pije dhe duhet patjetër të vlohet para përdorimit në 100 grade Celsius se paku 10 min.

4. Kompanitë ujore publike/ujësjellësit/ të përforcojnë kontrollin dhe rregullisht të dezinfektojnë ujin.

5. Ujësjellësit të furnizojnë qytetarët me ujë higjienik për pije me orar normal, për të pamundësuar kontaminimin dhe parandalimin e epidemive hidrike.

6. Ekipet e ujësjellësve rajonalë të debllokojnë nyjat e kanalizimeve për të mos kontaminuar lagjet e vërshuara me materie fekale në të gjitha vendbanimet e vërshuara.

“Ekipet kujdestare të Institutit Kombëtar po monitorojnë me kujdes situatën epidemiologjike dhe çdo ndryshim i situatës në terren do të pasojë me rekomandime të reja”, përfundon njoftimi për media i Institutit Kombëtar të Shëndetësisë Publike të Kosovës.