Huawei, Mbretëria e Bashkuar do të ndalojë instalimin e pajisjeve të reja të rrjetit 5G nga muaji shtator

Qeveria britanike tha se ofruesit e telekomunikacioneve duhet të ndalojnë instalimin e pajisjve Huawei në rrjetet 5G në Britani që nga shtatori i ardhshëm.

Sipas The Guardian, përcjell Telegrafi, sekretari dixhital, Oliver Dowden, përcaktoi një udhërrëfyes për të larguar shitësit me rrezik të lartë, përpara projekt-ligjit të telekomunikacionit (sigurisë) që del përpara parlamentit.

Legjislacioni do të krijonte kompetenca të sigurisë kombëtare për të imponuar kontrolle se kur dhe nëse një firmë telekomunikacioni mund të përdorte materialin e furnizuar nga kompani të tilla si Huawei.

Gjatë stinës së verës, qeveria njoftoi se firma kineze do të ndalohej nga pjesët kryesore më të ndjeshme të rrjeteve të Britanisë së Madhe.

Qeveria planifikon gjithashtu të largojë të gjitha pajisjet Huawei nga rrjetet 5G deri në vitin 2027 – vendime që do të rregullohen me ligj.

Ndërkohë, Dowden tani ka konfirmuar që operatorët duhet të ndalojnë instalimin e pajisjeve Huawei në rrjetet 5G nga fundi i muajit shtator të vitit të ardhshëm, përveç mirëmbajtjes së pajisjeve të instaluara më parë Huawei. /Telegrafi/