Haradinaj: Do të ishte e guximshme të shkohet me pagë minimale 400 euro

Kryetari i AAK-së Ramush Haradinaj ka komentuar vendimin e Qeverisë së Kosovës për ndarjen e 100 eurove shtesë për muajin prill dhe Ligjin për pagat.

Haradinaj ka thënë se ndarja e 100 eurove shtesë është një lloj mashtrimi.

“Kurti nuk po dëshmon se ka një plan të mëtejmë. Ai dëshiron t’i mbajë paratë në buxhet dhe kohë pas kohe po i kthen në njëburimore, por që nuk e ndryshon inflacionin. Minimum duhet të shkohet në rritjen e pagave dhe skemave pensionale nga 30-50 për qind, ndryshe nuk zgjidhen problemet”, tha Haradinaj, për RTV21.

Për më tepër, Haradinaj ka thënë se Qeveria Kurti po dëshiron qytetarët t’i mbajë të varur nga “pakoja e tij e herëpashershme”.

Lexo po ashtu Kurti prezanton Pakon e re: Nga 100 euro për punëtorët e sektorit privat e publik, studentët dhe pensionistët

“Sikur qeveria të kishte paralajmëruar nga 100 euro çdo muaj deri në fund të vitit do të ishte një zgjidhje. Kurti po dëshiron qytetarët t’i mbajë të varur nga pakoja e tij e herëpashershme”, tha Haradinaj.

Duke folur për ligjin për pagat, Haradinaj ka thënë se “do të ishte e guximshme të shkohet me pagë minimale 400 euro”.

“250 euro nuk është rritje me gjithë inflacionin dhe nuk mjafton. Ngritja e pagës minimale nuk është në proporcion me rritjen e pagave tjera”, ka thënë ai.