Hamasi shpjegon përgjigjen që ka dhënë ndaj planit të mbështetur nga SHBA për një armëpushim në Gaza

Hamasi thotë se ka paraqitur përgjigjen e tij ndaj një plani të mbështetur nga SHBA për një armëpushim në Gaza.

Ndërkohë një zyrtar i lartë i grupit i ka thënë BBC-së se grupi ende kërkon një angazhim izraelit për një armëpushim të përhershëm, përcjell Telegrafi.

Në një deklaratë, grupi dhe aleatët e tij të Xhihadit Islamik Palestinez (PIJ), shprehën “gatishmërinë për të arritur pozitivisht” një marrëveshje.

Plani i propozuar i armëpushimit – i cili u miratua nga këshilli i sigurisë i OKB-së të hënën mbrëma – bën thirrje për një armëpushim gjashtë-javor që përfundimisht do të bëhej i përhershëm.

Katari dhe Egjipti – të cilët, së bashku me SHBA-në, kanë ndërmjetësuar negociatat midis Izraelit dhe Hamasit – konfirmuan se grupi palestinez kishte paraqitur përgjigjen e tij.

Dhe në deklaratën e tij të martën në mbrëmje, Hamasi bëri thirrje për “ndërprerje të plotë” të luftimeve në Gaza.

Lexo po ashtu Publikohen pamjet e momentit dramatik kur ushtarët izraelitë 'bastisin ndërtesën e Hamasit' dhe shpëtojnë pengjet

“Përgjigja i jep përparësi interesave të popullit tonë palestinez dhe thekson domosdoshmërinë e një ndalimi të plotë të agresionit të vazhdueshëm në Gaza”, thanë Hamasi dhe PIJ.

Grupet shtuan se ishin të gatshëm “të angazhoheshin pozitivisht për të arritur një marrëveshje që i jep fund kësaj lufte”.

E zëdhënësi i Sigurisë Kombëtare të Shtëpisë së Bardhë, John Kirby, tha se ishte “e dobishme” që Hamasi kishte paraqitur një përgjigje dhe se zyrtarët amerikanë po “vlerësonin” kërkesat e grupit.

Më herët të martën, Sekretari amerikan i Shtetit, Antony Blinken theksoi se kryeministri izraelit Benjamin Netanyahu kishte “riafirmuar angazhimin e tij” ndaj planit të armëpushimit në Gaza dhe bota ishte duke pritur për përgjigjen e Hamasit.

Propozimi i paraqitur nga Presidenti Biden muajin e kaluar përfshin një armëpushim fillestar gjashtë-javor, me Hamasin që liron disa pengje në këmbim të Izraelit që liron një numër të papërcaktuar të burgosurish palestinezë.

Një fazë e dytë do të çonte në lirimin e pengjeve të mbetura nga Hamasi dhe një tërheqje totale të forcave izraelite nga Gaza si pjesë e një armëpushimi “të përhershëm”, por kjo e fundit do të ishte ende subjekt i negociatave. /Telegrafi/