Gruaja që ishte mbajtur peng nga Hamasi përshkruan se si u rrëmbye dhe u fut në një ‘rrjet të madh’ tunelesh – kritikon autoritetet në Izrael

Një penge izraelite e liruar nga Hamasi ka përshkruar përvojën e saj të hidhur pasi ajo u rrëmbye nga persona të armatosur dhe u fut në një sistem tuneli në Gaza gjatë sulmit vdekjeprurës të grupit militant palestinez në Izrael më 7 tetor, duke thënë “Kam kaluar nëpër ferr”.

Sipas mediave të huaja, përcjell Telegrafi, Yocheved Lifshitz, një gjyshe 85-vjeçare, e cila ishte një nga dy pengjet e liruara nga Hamasi të hënën, rrëfeu momentin kur militantët e rrëmbyen atë nga shtëpia e saj në Nir Oz dhe e larguan me një motoçikletë drejt Gazës, gjatë së cilit “akt” ajo tha se ishte goditur.

Lifshitz theksoi se ajo u detyrua të ecte në tokë të lagësht dhe zbriti në një sistem tuneli nëntokësor që e krahasoi me një rrjetë merimangash, ku u përshëndet nga “njerëzit që na thanë se besojnë në Kur’an” dhe premtuan “të mos e dëmtojnë” atë dhe të tjerët.

Vajza e Lifshitz, Sharone, e cila ndihmoi në përcjelljen e komenteve të nënës së saj te gazetarët jashtë një spitali në Tel Aviv të martën, e quajti atë një “rrjet të madh” tunelesh.

Lifshitz tregoi se ajo fillimisht ishte grupuar së bashku me 25 persona të tjerë përpara se rrëmbyesit e saj ta ndanin në një grup më të vogël me katër individë të tjerë.

Lexo po ashtu Hamasi publikoi një video që tregon momentin e lirimit të dy pengjeve - para lirimit, dy grave iu dhanë çaj dhe biskota

Ajo tregoi se ata flinin në dyshekë në dyshemenë e tuneleve, hëngrën të njëjtin ushqim si luftëtarët e Hamasit dhe morën trajtim të rregullt nga mjekët gjatë burgosjes së saj.

“Ata ishin shumë bujarë me ne, shumë të sjellshëm. Ata na mbajtën të pastër”, tha Lifshitz. “Ata u kujdesën për çdo detaj. Ka shumë gra dhe ato dinë për higjienën femërore dhe janë kujdesur për gjithçka atje”.

Por Lifshitz akuzoi Forcat e Mbrojtjes të Izraelit dhe shërbimin e inteligjencës Shin Bet se nuk i morën “seriozisht” kërcënimet nga Hamasi dhe tha se gardhi i kushtueshëm i kufirit të Gazës i ngritur nga Izraeli nuk kishte bërë asgjë për të mbrojtur komunitetin e saj nga sulmi i Hamasit.

“… Papritur një mëngjes të së shtunës, gjithçka ishte shumë e qetë. Pati një goditje të fortë në vendbanim”, tha Lifshitz.

Sipas saj, jo shumë kohë më vonë, “hordhitë” e luftëtarëve të Hamasit depërtuan nëpër gardhet “e shtrenjta” dhe vazhduan të vinin.

Ndërsa përfundoi fjalët e saj, Sharone tha se ndjenja e nënës së saj ishte se “historia nuk ka përfunduar derisa të kthehen të gjithë”. /Telegrafi/