Gjyqësori iranian thotë se dy organizatore të një maratone janë arrestuar sepse u kanë lejuar grave që nuk mbanin hixhab të marrin pjesë.
Ky veprim vjen pasi imazhet e grave të pazbuluara që garonin u shfaqën në internet.
2000 gra dhe 3000 burra morën pjesë veçmas në maratonën në ishullin Kish, pranë brigjeve jugore të Iranit.
Të veshura me bluza të kuqe, disa nga konkurrentet femra nuk kishin veshur hixhab apo ndonjë mbulesë tjetër koke.
Kjo shkaktoi reagime shumë të ndryshme.
Shumë mbështetës të ndryshimit në Iran i përshëndetën me entuziazëm imazhet.
Nga ana tjetër, zyrtarët iranianë i janë përgjigjur kësaj si një sfidë e papranueshme ndaj status quo-së.
Andaj, gjyqësori ka vepruar shpejt kundër organizatorëve.
Jo vetëm shkelja e rregullave mbi hixhabin nga disa konkurrente femra, por edhe fakti që maratona thjesht u mbajt, bëri që organizatorët të merrnin dënim nga udhëheqja e vendit.
Vetëm pak vite më parë, pamja e kaq shumë grave iraniane me veshje sportive që merrnin pjesë në një ngjarje kaq masive publike - edhe nëse ishin të ndara nga pjesëmarrësit meshkuj - do të shihej si një shkelje.
Prokurori në Kish tha se mënyra se si po zhvillohej gara ishte në vetvete një "shkelje e mirësjelljes publike".
Ndërkohë, çështja e hixhabit mbetet në qendër të debatit se ku mund të shkojë Irani.
Veprimet e qeverisë kundër grave që shfaqen në publik pa mbulesë koke kanë qenë të ndryshme - ndonjëherë duke lejuar një zbutje të rregullave, në të tjera duke marrë masa të rrepta ndaj çdo shkeljeje. /Telegrafi/
