Gjykata e Apelit refuzon ankesën e Prokurorisë për rastin e MTPT-së

Gjykata e Apelit e ka refuzuar si të pa bazuar ankesën e Prokurorisë Speciale kundër Fatmir Limajt dhe të tjerëve në rastin e njohur të MTPT-së.

Ish-ministri i MTPT-së, Fatmir Limaj, Endrit Shala (tani ministër i MTI-së), Nexhat Krasniqi, Shpëtim Telaku dhe Florim Zuka, akuzoheshin nga Prokuroria për shkak te veprave penale nga Kodi Penal i Kosovës, si krim i organizuar, shpërdorimi i pozitës zyrtare ose i autorizimit, marrje e ryshfetit, dhënie e ryshfetit, keqpërdorimi i autorizimeve ne ekonomi dhe vepra tjera penale në formë të mos deklarimit të parave të pranuara për fushatë, parashikuar me Rregulloren e UNMIK-ut 2004/2 për pengimin e shpëlarjes së parave dhe veprave të ngjashme penale.

“Aktgjykimi i Gjykatës Themelore në Prishtinë i datës 24.11.2017, është vërtetuar. Gjykata gjeti se shkalla e parë nuk ka bërë shkelje esenciale procedurale, ka aplikuar drejte ligjin penal, si dhe e ka vërtetuar drejtë dhe në mënyrë të plotë gjendjen faktike”, thuhet në komunikatën e Gjykatës së Apelit. /Telegrafi/