Gjykata do ta marrë me forcë Ymerin, nëse nuk shkon në seancën e prillit (Video)

Me forcë do të sillet përsëri në Gjykatë kryetari i Vetëvendosjes, Visar Ymeri, në muajin prill.

Të hënën, ai e ka injoruar përsëri thirrjen e Gjykatës Themelore të Prishtinës për t’u paraqitur si i akuzuar për lëndim të lehtë trupor shkaktuar deputetit Bekim Haxhiu, raporton KTV.

Gjyqtari ka njoftuar se në seancën e ardhshme, ku do të mbahen fjalët përfundimtare të palëve, Ymerin do ta sjellë Policia me detyrim.

I pranishëm në seancë megjithatë ka qenë kolegu partiak i Ymerit, deputeti tjetër i akuzuar, Rexhep Selimi, dhe vozitësi i tij, Besart Bujupi, dhe pala e dëmtuar, deputeti i PDK-së, Bekim Haxhiu.

Seanca e kaluar që ka qenë e 16-ta me radhë është mbajtur, por vetëm pasi Policia e kishte sjellë me forcë kryetarin e VV-së në gjykatë.

Ymeri asnjëherë vullnetarisht nuk u është përgjigjur ftesave të gjykatës.

Zëdhënësi i VV-së, Frashër Krasniqi, nuk ka sqaruar arsyen e mungesës së Visar Ymerit.

“Kryetari Ymeri, në seancën e kaluar gjyqësore, ka deklaruar atë çka mendon për këtë proces gjyqësor dhe pse kjo aktakuzë është thjeshtë trillim i Bekim Haxhiut”, ka thënë Krasniqi për KTV-në.

Rasti për të cilin akuzohen deputetët e VV-së është i 2012-ës, kur Bekim Haxhiu kishte ngritur kallëzim penal sepse pretendon se u rrah nga deputetët e Vetëvendosjes në qershor të atij viti.

Akuzat janë mohuar nga deputetët e Vetëvendosjes, të cilët kanë thënë se kjo është akuzë politike se në raste tjera Prokuroria nuk veproi njësoj.

Tashmë akuza ndaj ish-deputetit të Vetëvendosjes Florin Krasniqi është veçuar, meqenëse gjykata është informuar se i akuzuari është në SHBA, së paku deri në muajin qershor.