Gjendja e sigurisë përgjithësisht stabile, më e brishtë në katër komunat në veri – Musliu paralajmëron rritjen e kërcënimeve nga Serbia 

Kryetarja e Komisionit për Mbikëqyrjen e Agjencisë së Kosovës për Inteligjencë, Ganimete Musliu pas takimin me drejtorin e AKI-së, Petrit Ajeti në një konferencë për media ka bërë të ditur se gjendja e përgjithshme e sigurisë në vend në përgjithësi është stabile, megjithëse sipas saj, situatë më e brishtë paraqitet në katër komunat në veri për shkak të ndërhyrjeve nga Serbia.

Musliu në një deklaratë për media tha se Serbia përmes strukturave të saj po bën përpjekje për të rritur gatishmërinë te serbët lokalë për qëllim tensionimit të situatës në Kosovë si dhe ka angazhuar mekanizmat e saj ilegalë për të monitoruar aktivitetet e strukturave të sigurisë në Kosovë.

“Konstatojmë se gjendja e përgjithshme e sigurisë në vend në përgjithësi është stabile. Situata më e brishtë në Republikën e Kosovës paraqitet në kuadër të katër komunave në veri, për shkak të ndërhyrjeve nga Serbia dhe aktiviteteve të shtuara të strukturave ilegale, grupeve kriminale dhe organizatave e të ndryshme radikale”.

Serbia përmes strukturave të saj po bën përpjekje për të rritur gatishmërinë te serbët lokalë për qëllim tensionimit të situatës në Kosovë. Serbia ka angazhuar mekanizmat e saj ilegalë për të monitoruar aktivitetet e strukturave të sigurisë në Kosovë, por edhe të bëjë lëvizje të strukturave ndërkombëtare që veprojnë në Kosovë”, tha ajo, raporton Telegrafi.

Kryetarja e Komisionit për Mbikëqyrjen e AKI-së bëri të ditur se AKI bazuar në të dhënat e saj raportoi për veprimtarinë e strukturave të Serbisë që në muajt e ardhshëm niveli i kërcënimit nga Serbia mund të rritet kur i kemi parasysh mobilimin e strukturave të sigurisë dhe mbrojtjes së Serbisë, deklaratat kërcënuese të Serbisë për Kosovën si dhe rritjen e financimit dhe forcimit të strukturave të kundërligjshme në Kosovë, mbështetja e individëve dhe grupeve të krimit të organizuar për të ushtruar aktivitete të kontrabandës, ekonomisë joformale, kalimet ilegale.

Musliu më tej tha se cak mund të jetë pronat e shqiptarëve në veri të Mitrovicës, Lagjja e Boshnjakëve, Kroi i Vitaku dhe Kodra e Minatorëve.

“Target janë edhe banesat kolektive brenda qytetit në veriut të Mitrovicës, ndërtimet në katër komunat në veri janë pa leje të institucioneve te Kosovës dhe trendi i largimit të shqiptarëve përbënë shqetësim edhe për ne edhe për AKI-n”, tha ajo, derisa ftoi institucionet që të jenë të vëmendshme. /Telegrafi/