LAJMI I FUNDIT:

Gati projektligji që integron Shqipërinë në tregjet e kriptovalutave

Gati projektligji që integron Shqipërinë në tregjet e kriptovalutave

Deri sa në Tiranë është duke u zhvilluar Konferenca e 41-të Ndërkombëtare për Mbrojtjen e të Dhënave, e cila ka sjellë përfaqësues të kompanive të teknologjisë si Microsoft, Facebook apo MasterCard, Qeveria e Shqipërisë ka përgatitur një ligj që do të sjellë rregullimin në tregun dixhital.

Projektligji për Tregjet Financiare të bazuara në Teknologjinë e Regjistrave të Shpërndarë, pritet të dërgohet shumë shpejt në Kuvend, duke rregulluar një sektor që në vitet e fundit ka marrë një hov zhvillimi edhe në Shqipëri.

Ligji përcakton metodat e licencimit të operatorëve vendas apo të huaj, duke i hapur rrugë regjistrimit të kompanive që operojnë me teknologjinë më të avancuar të teknologjisë Blockchain edhe në vend.

Një teknologji e tillë e pathyeshme përdoret aktualisht edhe nga kriptovalutat më e famshme në botë Bitcoin, por kjo teknologji mund të gjejë zbatime në shumë fusha.

Bitcoin bie me 500 dollarë në vetëm pak minuta
Lexo po ashtu Bitcoin bie me 500 dollarë në vetëm pak minuta

Sipas ekspertëve, deri në vitin 2030, shumica e transaksioneve tregtare në botë do të realizohen përmes teknologjisë së Blockchain, e cila për herë të parë fut konceptin e një kontrate të vetënegociueshme dhe vetëzbatueshme nga ana e biznesit.

Në fjalë të tjera, në momentin e pajtimit të një kontrate, mbi bazën e kësaj teknologjie ajo bëhet ‘smart’ dhe si e tillë, e vetëekzekutueshme.

Aktualisht, teknologjia Blockchain po gjen një përhapje të madhe jo vetëm në fushën e tregtisë, por edhe në shëndetësinë e avancuar, e-learning, energjinë e rinovueshme, mbrojtjen e mjedisit, zhvillimin e bujqësisë, etj.

Projektligji i hartuar në përputhje me modelet më të avancuara në botë dhe rekomandimet e Bashkimit Evropian, synon që duke hapur tregun shqiptare ndaj kësaj teknologjie të re, të nxisë formimin e bizneseve fillestare shqiptare në fushën e Hi-Tech, duke rritur punësimin, veçanërisht tek të rinjtë.

Një qëllim i dytë i këtij ligji është përshpejtimi i revolucionit dixhital, sidomos për sa i përket pagesave dixhitale, të cilat falë rritjes së transparencës dhe gjurmës shërbejnë për të luftuar direkt evazionin fiskal apo fenomenin e pastrimit të parave. /Tema/