Gati Abetarja e përbashkët, Rama: Krijesë e bashkimit të vullneteve të qeverive të Shqipërisë dhe Kosovës

Kryeministri i Shqipërisë, Edi Rama ka publikuar sot foton e Abetares së unifikuar midis Shqipërisë dhe Kosovës, e cila tashmë është gati për tu futur në sistemin arsimor në të dyja vendet. 

Në një postim në Facebook, Rama tha Abetarja është krijesë e bashkimit të vullneteve të qeverive të Shqipërisë dhe Kosovës.

“Gëzuar Abetaren e Parë të unifikuar, krijesë e bashkimit të vullneteve të qeverive të Shqipërisë dhe Kosovës, për të gjithë fëmijët shqiptarë këtej e andej bjeshkëve, e kudo ata ndodhen”, ka shkruar Rama.

Më herët, ministrja e Arsimit dhe Sportit, Evis Kushi zhvilloi një takim me mësues të klasave të para, me të cilët ndau për herë të parë Abetaren e re të përbashkët unike që do të përdoret në Shqipëri, Kosovë dhe diasporë.

Duke qenë se viti i ri shkollor 2022-2023 nis më parë në Kosovë më 1 shtator, e më pas në Shqipëri me 12 shtator, ministrja Kushi informon se në 1 shtator së bashku me homologen Nagavci do të prezantojnë abetaren unike për nxënësit e klasave të para në Kosovë.

Në dhjetor të vitit 2021, ministrja e Arsimit dhe Sportit të Shqipërisë, Evis Kushi dhe ministrja e Arsimit dhe Shkencës së Kosovës, Arbërie Nagavci nënshkruan marrëveshjen për Abetaren e përbashkët. /Telegrafi/