Fundjava nëpër Evropë

Një javë tjetër, me ndeshje tjera, me pak sfida të mëdha, por të cilat mund të kenë ndikim në renditjen tabelare të skuadrave. Kampionateve më të forta në pasqyrën e kësaj fundjave do t’u bashkohen edhe Raiffeisen Superliga e Kosovës dhe Kampionati Superior i Shqipërisë.

Kampionatet

Liga Premier: Fundjava fillon me ndeshjen më të madhe: Derbi i Londrës mes Arsenalit dhe Tottenhamit. Arsenali do të jetë në krye të tabelës, ndoshta përkohësisht në rast të fitores, përderisa Tottenhami do ta rikthente pozitën e katërt me tri pikët.

Chelsea do të kërkojë fitore në udhëtimin e vështirë te Birminghami, teksa Manchester United do ta presë Wiganin në Old Trafford dhe Liverpooli në Anfield luan ndaj West Hamit.

Në ndërkohë, të dielën Blackburni do të përballet me Aston Villën, para se Sunderlandi dhe Evertoni ta mbyllin këtë javë në Ligën Premier të hënën.

La Liga: Real Madridi ende është në krye të tabelës para se ta presë Athletic Bilbaon të shtunën mbrëma, me Barcelonën që po udhëton te Almeria para sfidës madrilene. Por para tërë këtij aksioni të dy superskuadrave, është dhe derbi i vendit të tretë me të katërtin, Villareali kundër Valencias.

E diela sjell ndeshjen Sevilla-Mallorca, ndërsa Atletico Madridi udhëton në Baski për t’u takuar me Real Sociedadin, kurse të hënën përmbyllet kjo javë me ndeshjen Getafe-Zaragoza.

Serie A: Java fillon me ndeshjen e parë e cila e sheh Udinesen e pamposhtur që disa ndeshje të përballet me Romën e dalur nga kriza. Fiorentina që po vuan do të takohet me Milanin, që mund ta zgjerojë distancën në tabelë me rivalët.

Interi i shkon Chievos në një ndeshje shumë të rëndësishme për Nerazzurët në krizë.

Bundesliga: Si për çudi, kjo javë në Bundesliga fillon pa një ndeshje të premtën mbrëma, por me agjendë të ngjeshur të shtunën pasdite. Eintrachti i shkon Hoffenheimit, Schalke takohet me Werderin, ndërsa Hannoveri do të përballet me Hamburgun, këto janë ndeshjet më interesante, para se Bayerni t’i shkojë Leverkusenit në derbin e kësaj fundjave.

Të dielën Stuttgarti përballet me Kolnin, ndërsa Wolfsburgu do të udhëtojë te St.Pauli në ndeshjen e fundit.

Kosovë dhe Shqipëri: Java e 17-të në Superligën e Kosovës në futboll hapet me udhëtimin e vështirë të Trepçës te KEK-u. Besa më pas do të përballet në derbin e Dukagjinit me Ballkanin, përderisa Vëllaznimi e pret Trepçën ’89 pa praninë e tifozëve. Prishtina e zhvillon derbin ndaj Flamurtarit në Stadiumin e Qytetit.

Java e 12-të në Superioren shqiptare është hapur me duelin Bylis – Vllaznia që përfundoi pa gola. Tirana e pret Elbasanin, kurse Dinamo në transfertë do të ketë punë me Flamurtarin.

/Telegrafi/