Forcat ukrainase për operacione speciale (SSO) kanë njoftuar se kanë shkatërruar raketahedhësin shumëçelësor rus BM-27 Uragan dhe kanë sulmuar trupat ruse në rajonin e Donetskut.
Në sulmet, të cilat u realizuan sot herët në mëngjes, u përdorën dronë FP-2 të prodhimit vendas, shkruan Kyiv Post.
Sipas një njoftimi të publikuar në Telegram, sulmi ndodhi në vendbanimin Blahodatne.
“SSO goditi depot e raketave BM-27 Uragan dhe pozicionin e ekuipazhit të tij,” thuhet në deklaratë. BM-27 Uragan është një sistem raketash shumëçelësor me kalibër 220 mm, i cili mund të lëshojë raketa me shpërthim të lartë dhe projektile kasetë deri në një distancë prej 35 kilometrash.
SSO raportoi gjithashtu për sulme ndaj përqendrimeve të forcave ruse në zonën e Pokrovska. Sipas njoftimeve, trupat ruse u përpoqën të vendosnin pozicione përgjatë linjës hekurudhore për të avancuar më tej, por dronët ukrainas i sulmuan me eksploziv gjatë lëvizjes. Në sulm humbën jetën disa ushtarë rusë.
Pas sulmeve me dronë, pjesëtarët e Regjimentit të 3-të të SSO-së eliminuan edhe dy ushtarë të tjerë rusë që ishin fshehur në llogore.
“Pavarësisht zjarrit të fortë artilerik rus, grupi ynë realizoi me sukses detyrën dhe pengoi armikun të siguronte pozicionet e planifikuara”, thuhet në deklaratë.
Këto operacione ndodhën pas sulmeve të kryera të dielën, më 14 dhjetor, kur u godit, ndër të tjera, një tren që transportonte karburant në Krimenë e pushtuar.
Raportohet gjithashtu për sulme ndaj stacionit rus të luftës elektronike Volna-2 pranë Maryanivkës dhe qendrës për trajnimin e operatorëve të dronëve FPV pranë Dokuchayevskit. /Telegrafi/
