Forcat ukrainase kapin ish-pjesëtarin e Wagner që ishte dëshmitar i ekzekutimit të ushtarëve të burgosur ukrainas

Ushtarët ukrainas nga Brigada e 47-të e Motorizuar kanë arritur të zënë në rajonin rus Kursk një ushtar rus nga Brigada e 155-të, i cili tha se ishte dëshmitar i ekzekutimit të ushtarëve ukrainas.

Megjithatë mbetet e paqartë nëse ushtari i arrestuar rus që është emëruar si Yuri Pitkevich, kishte marrë pjesë në ekzekutimin e ushtarëve ukrainas, transmeton Telegrafi.

Në tetor të vitit 2022, derisa po vuante dënimin në një burg në Rusi, ai ishte pajtuar të nënshkruaj një kontratë me grupin mercenar rus Wagner.

Si anëtar i një njësie të Wanger, fillimisht mori pjesë në luftimet në Soledar dhe Bakhmut në rajonin ukrainas Donetsk.

Në qershor të vitit të kaluar, ai ishte gjithashtu pjesë e puçit të Wagner, ku trupat e këtij grupi mercenarësh kishin marshuar drejt Moskës në krye me liderin e atëhershëm Yevgeny Prigozhin.

Në qershor të këtij viti, Pitkevich nënshkroi një kontratë të re dhe iu bashkua Brigadës së 155-të të forcave të Federatës Ruse.

Në gusht kur brigada e tij zbarkoi në rajonin e Kurskut, mori drejtpërdrejt pjesë në luftimet kundër ukrainasve.

E në fund të shtatorit, ishte dëshmitar i vrasjes së dy ushtarëve të burgosur ukrainas në afërsi të fshatit Glushkovo.

Sipas tij, urdhri për ekzekutimin dhe prerjen e kokave të tyre e dha komandanti i njësisë.

Pitkevich madje zbuloi identitetin e komandantit si dhe të ushtarëve që morën pjesë në kryerjen e krimeve të luftës. /Telegrafi/