Një ndërtues i cili fitoi lotarinë prej 76 milionë funte në nëntor të vitit të kaluar tanimë ka blerë gjashtë supervetura.
Sipas mediave të huaja, përcjell Telegrafi, Andrew Clark dhe partnerja e tij Trish Fairhurst, nga Boston në Lincolnshire, arritën fitimin e 12-të më të madh në Britani të Madhe pas blerjes së biletës së lotarisë.
Kështu, siç thuhet tutje, ai ka shpenzuar 660,000 funte nga fitimet e tij duke blerë vetura luksoze, përfshirë edhe një Porsche 911 Turbo në vlerë prej 121,000 funte, si dhe një McLaren në vlerë prej 128,055 funtesh.
Por Trish do të vazhdojë ta drejtojë Nissan Qashqain prej 20,000 paund, të cilën ajo e bleu pas fitimit të EuroMillions në nëntor të vitit të kaluar.
Ndryshe, Clark kishte vozitur për gjashtë javë furgonin e tij, pa e ditur se në kapakun e tavanit, e ka tiketën e lotarisë me të cilën ka fituar lotarinë multimilionëshe.
Clark që e konsideron vetën si ‘njeriu që gati i humbi milionat’ as që i shkonte mendja ta shikonte tiketën, derisa e bindi e dashura Trisha Fairhust.
Gjithçka ndodhi, në kohën kur po vinte koha e fundit që një fitues ta pranonte fitoren, përndryshe do kalonte afati dhe mund të humbiste.
“Ajo do të ketë të gjitha gjërat që i dëshiron, gjatë tërë jetës së saj”, ka thënë Clark, për të dashurën e tij, që e bindi ta shikonte tiketën.
Përveç veturave të shtrenjta, me paratë e fituara, ai bleu një shtëpi me katër dhoma gjumi. /Telegrafi/
