Fati i Evropës varet nga mënyra se ‘si përfundon lufta në Ukrainë’, thotë ministri i jashtëm i Moldavisë

Ministri i Jashtëm moldav i tha Sky News se e ardhmja e vendit të tij dhe e Evropës në tërësi varet nga mënyra se si përfundon lufta në Ukrainë.

Nicu Popescu tha: “E ardhmja e të gjithë kontinentit mbështetet në kapacitetin e Ukrainës për të ruajtur sistemin e saj politik, qëndrueshmërinë e vendit të saj”.

“Në një farë kuptimi, fati dhe e ardhmja e çdo vendi në këtë pjesë të botës… varet nga mënyra se si përfundon kjo luftë, ku përfundon dhe kur përfundon”, ka thënë ndër tjerash ai, përcjell Telegrafi.

Lexo po ashtu Rusia qëndron pas sulmeve në rajonin separatist të Moldavisë – thotë Zelensky

Deklaratat e tij vijnë pak ditë pasi presidenti i Ukrainës, Volodymyr Zelensky, ka thënë se “shërbimet speciale” ruse qëndrojnë pas një serie shpërthimesh në një rajon separatist pro-rus të Moldavisë.

Bëhet fjalë për rajonin Transnistria – që kufizohet me Ukrainën – i cili ka parë një numër sulmesh në ditët e fundit.

Ndryshe, më parë, një këshilltar i lartë i presidentit Vladimir Putin tha se rusishtfolësit në Moldavi po shtypeshin – i njëjti pretendim që po përdoret për të justifikuar pushtimin e Ukrainës. /Telegrafi/