Facebook, Twitter dhe Youtube fshijnë videon “e mjekëve që bënë pretendime të rreme rreth coronavirusit” – pasi ajo u pa miliona herë

Një video ku paraqitej një grup mjekësh që bënin pretendime të rreme dhe të dyshimta në lidhje me coronavirusin u hoq nga Facebook, Twitter dhe YouTube pasi shkoi viral në internet të hënën.

Sipas CNN, përcjell Telegrafi, videoja, e publikuar nga media e krahut të djathtë “Breitbart News”, shfaqte një grup njerëzish të veshur me të bardha laboratori duke e quajtur veten “America’s Frontline Doctors” që po zhvillonte një konferencë shtypi përpara Gjykatës Supreme të SHBA-së në Uashington, DC.

Madje, po sipas CNN, edhe presidenti amerikan, Donald Trump ndau versione të shumta të videos me 84 milionë ndjekësit e tij në Twitter të hënën mbrëma, përkundër pretendimeve të dyshimta që kundërshtojnë ekspertët e vetë administratës së tij të shëndetit publik.

Zëdhënësit për Shtëpinë e Bardhë nuk iu përgjigjën menjëherë kërkesave për koment, shkruan më tej CNN.

Gjatë konferencës për shtyp, një folës i cili e identifikon veten si mjek bën një numër pretendimesh të dyshimta, duke përfshirë që “nuk ju duhen maska” për të parandaluar përhapjen e coronavirusit, dhe se studimet e fundit që tregojnë hydroxychloroquine është joefektive për trajtimin e COVID-19 janë “shkencë e rreme” e sponsorizuar nga “kompani të rreme farmaceutike”.

“Ky virus ka një kurë, quhet hydroxychloroquine, zink dhe Zithromax”, pretendon një grua. “Ju nuk keni nevojë për maska, ka një kurë”.

Siç shkruan mediumi amerikan CNN, pretendimet bien ndesh me studime të shumta mbi ilaçin kundër malarias dhe këshillat e zyrtarëve të shëndetit publik për të parandaluar përhapjen e virusit.

Videoja shpejt u bë virale në Facebook, duke u bërë një nga postimet me performancat më të larta në platformë me më shumë se 14 milionë shikime para se të largohej të hënën në mbrëmje për promovimin e dezinformatave.

Ajo madje u shpërnda afro 600,000 herë, sipas Crowdtangle, një firmë analitike e të dhënave në pronësi të Facebook.

Gjithashtu, shkruan CNN, edhe Twitter ka punuar për të fshirë videon vonë të hënën në mbrëmje pasi Trump ndau versionet e videos që grumbulluan qindra mijëra shikime.

Veç këtyre, videoja u hoq gjithashtu nga YouTube, ku ishte parë më shumë se 40,000 herë.

Përdoruesit që po përpiqeshin të hynin në video të hënën vonë u ‘përshëndetën’ me një mesazh që thoshte se ishte hequr për “shkelje të Udhëzimeve të Komunitetit të YouTube”.

Ndryshe, deri të hënën, virusi ka shkaktuar gati 150,000 vdekje në SHBA, sipas Universitetit Johns Hopkins, dhe është në rrugën e duhur për t’u bërë një shkak kryesor i vdekjeve në vend. /Telegrafi/