Coronavirusi, interesim më i madh i qytetarëve për të blerë artikuj elementarë

Nga frika se mund të ketë mungesë të ushqimeve në treg dhe shtrenjtim të tyre, është shtuar numri i qytetarëve nëpër pikat shitëse, ku është rritur blerja e produkteve esenciale.

Përkundër shqetësimit global me coronavirusin, qytetarët e Kosovës nuk duken të shqetësuar shumë me këtë virus.

“Ne populli shqiptar jemi imun ndaj këtyre virusëve”, deklaroi për RTV Dukagjinin, qytetari Bahri Murishi.

“Nuk besoj se më kap ajo sëmundje pasi përdori disa ushqime më origjinale, që janë vendore”, deklaroi qytetari tjetër Pal Gashi, përcjell Telegrafi.

Mirëpo, është shtuar blerja e produkteve ushqimore. Këtë e thonë jashtë kamerës, edhe menaxherët nëpër pikat shitëse.

“Kryesisht artikuj bazikë dhe higjienikë. Sa u përket artikujve ushqimorë, ata që po shiten më shumë janë  mielli, sheqeri, vaji, orizi”, deklaroi menaxheri i një marketi.

Këtë përmes një përgjigje më shkrim, e ka konfirmuar edhe menaxherja e rrjetit të marketeve, ETC, Valentina Bytyqi.

“Po vërehet kohëve të fundit një rritje e blerjeve, rritje po thuajse në të gjitha kategoritë, mirëpo fokusi është  kryesisht për produktet esenciale. Blerjet më së shumti janë të orientuara tek produktet esenciale, pra miell, vaj, sheqer, kripë, qumësht etj. etj., gjithashtu edhe për produktet higjienike ka interesim të shtuar”, tha në përgjigjen e saj Valentina Bytyqi.

Ajo tha se deri më tani nuk ka ndonjë informatë se mund të ketë rritje të çmimeve./RTV Dukagjini/Telegrafi/