“Është një metodë e vjetër e operativëve të KGB-së”, një burim nga burgu ku mbahej Navalny pretendon se e di si u vra kritiku i Putinit

Një burim nga burgu i Rrethit Arktik, ku lideri i opozitës ruse Alexei Navalny u shpall i vdekur të premten e kaluar, pretendon se kritiku i politikave të presidentit Vladimir Putin është vrarë “nga një goditje e vetme në zemër”, një teknikë e përdorur nga KGB-ja.

Daily Mail raporton deklaratat e Vladimir Osechkin, një disident rus dhe aktivist për të drejtat e njeriut, i cili beson se mavijosjet e gjetura në trupin e Navalny korrespondojnë me pasojat e metodës së ekzekutimit “me një goditje”, transmeton Telegrafi.

“Është metodë e vjetër e departamenteve speciale të KGB-së. Ata trajnojnë operativët për të vrarë një burrë me një goditje të vetme në zemër, në pjesën qendrore të trupit. Kjo është shenja e KGB-së”, tha Osechkin për Times.

Osechkin thuhet se është themeluesi i organizatës Gulagu.net, e cila mbledh dëshmi nga të burgosurit dhe punonjësit e burgjeve famëkeqe ruse.

Ai e mori këtë informacion nga një person i punësuar në koloninë penale të Arktikut, ku ishte vendosur Navalny.

E Yulia Navalnaya, e veja e liderit të opozitës ruse, akuzoi Putinin për vrasjen e bashkëshortit të saj dhe pretendoi se ai ishte helmuar me agjentin nervor Novichok.

Ajo akuzoi gjithashtu autoritetet ruse se po përpiqeshin të mbulonin vrasjen, duke refuzuar të dorëzonin trupin e Navalny.

Megjithatë, Osechkin nuk është i bindur për këtë dhe pretendon se autoritetet ruse mund ta kishin vrarë Navalny-n ashtu siç donin, por se nuk do të donin “të linin një shenjë në trup që do të çonte drejtpërdrejt te Putini”.

Osechkin pretendon se para vdekjes së tij, Navalny u detyrua të kalonte dy orë e gjysmë deri në katër orë në izolim, ku temperatura ra në minus 27 gradë Celsius.

“Mendoj se fillimisht e shkatërruan trupin duke e mbajtur në të ftohtë për një kohë të gjatë, dhe duke ngadalësuar në minimum qarkullimin e gjakut. Dhe pastaj bëhet shumë e lehtë të vrasësh dikë, brenda pak sekondash, nëse operativi ka përvojë”, tha Osechkin, duke iu referuar teknikës “një goditje ” që nuk lë të dhëna për shkakun e vdekjes. /Telegrafi/