Escobar në Pejë: Komuniteti serb po vuan shkaku i vendimit për dinarin, duhet një zgjidhje urgjente

I dërguari special i SHBA-së për Ballkanin Perëndimor, Gabriel Escobar, ka qëndruar sot për vizitë në Pejë.

Gjatë kësaj vizite, Escobar është takuar me kryetarin e komunës së Pejës, Gazmend Muhaxheri.

Escobar ka thënë se ka ardhur në këtë qytetet që të dëgjoj rrëfimet e qytetarëve se si janë ndikuar nga vendimi i Bankës Qendrore të Kosovës”.

“Këtu ka një komunitet që po vuan vërtet. Ka njerëz që përballen me probleme reale për shkak të mungesës së mundësive për të marrë pensione. Kështu që unë me të vërtetë dua të punoj me qeverinë e Kosovës me shpresën për të gjetur një zgjidhje urgjente”, tha Escobar për Radio Gorazhdevac.

Lexo po ashtu Escobar dhe Hovenier priten në takim nga kryetari i Pejës

Escobar tha se serbët në Kosovë dhe të gjithë që jetojnë këtu duhet ta ndiejnë mbështetjen e SHBA-së.

“Për komunitetin këtu, unë dua që këta të ndiejnë dhe të dinë se qeveria amerikane do që serbët të jetojnë në Kosovë në kushte të sigurisë dhe dinjitetit dhe ne do të vazhdojmë të punojmë për këtë, dhe për Qeverinë e Kosovës – ata kanë përgjegjësinë që kjo të ndodhë dhe ne do ta mbajmë përgjegjëse për këtë”, u shpreh emisari amerikan.

Escobar shtoi se marrëveshja e fundit Kosovë-Serbi duhet të zbatohet dhe tha se për këtë do të vazhdohet të punohet.

“Ndërkohë, në një afat më të gjatë, ne ende duhet të punojmë shumë për të zbatuar marrëveshjen historike të normalizimit që arritëm marsin e kaluar”, tha ai. /Telegrafi/