Erdogan urdhëron patrullimin e hapësirës ajrore me aeroplanë luftarakë, njësitet speciale “vërshojnë” rrugët e Stambollit (Foto)

Të paktën 290 persona janë vrarë dhe më shumë se 1.400 tjerë janë plagosur, në përleshjet e armatosura në Ankara dhe Stamboll.

Ushtria turke është përpjekur të marrë pushtetin, dhe të rrëzojë presidentin Recep Tayyip Erdogan, transmeton Telegrafi.

Në rrugët e Stambollit dhe Ankarasë, janë zhvilluar luftëra të vërteta mes ushtrisë dhe policisë të përkrahur nga një numër i qytetarëve, që ishin kundër puçit që po tentohej të zhvillohej.

Por puçistët shumë shpejt janë mposhtur, derisa tash e tre ditë mijëra qytetarë kanë dalë rrugëve të qyteteve turk pas thirrjes së presidentit turk në “mbrojtje të demokracisë”.

Në kuadër të hetimit rreth tentimit të dështuar ushtarak të grusht shtetit, deri më tani janë arrestuar 6.000 persona, në mesin e të cilëve dikur bashkëpunëtori i ngushtë i presidentit turk.

Erdogan ka përmendur mbrëmë edhe mundësinë e rikthimit të dënimit me vdekje, pasi që zyrtarisht ishte hequr në vitin 2004, si kusht për kandidaturë për anëtarësim në Bashkimin Evropian. Por e gjithë bota është duke e vëzhguar me vëmendje situatën në Turqi.

Çfarë dihet deri më tani:

Një pjesë e ushtrisë ka tentuar të rrëzojë qeverinë turke

Presidenti Recep Tayyip Erdogan, është kthyer në Turqi dhe ka deklaruar se puçi ka dështuar

Në përleshje të armatosura kanë humbur jetën të paktën 290 persona, kurse janë plagosur më shumë se 1.400.

Qeveria akuzon klerikun mysliman në mërgim Fetullah Gulen, se qëndron prapa grusht shtetit

Gulen ka mohuar kategorikisht zërat se është i përfshirë në puç

Tetë ushtarë kanë ikur në Greqi

Njëri nga udhëheqësit e puçit, është ish-komandanti i forcave ajrore

Presidenti turk ka kërkuar ekstradimin e Fetullah Gulen

Gulen ka deklaruar se do t’i përgjigjet kërkesës së ekstradimit, dhe se Erdogan qëndron prapa grusht shtetit të organizuar

Populli është duke kërkuar që organizatorët e puçit të dënohen me vdekje

Qeveria turke ka bërë të ditur se numri i të arrestuarve ka shkuar në 6.000, dhe se ky numër pritet të rritet

Në mesin e të arrestuarve eshte edhe ndihmësi ushtarak i Erdoganit

NATO sërish ka hapur bazën ushtarake Incirlik

Mogherini: Turqia të ruaj shtetit ligjor

Përfaqësuesja e Lartë e BE-së për Politikë të Jashtme dhe Siguri, Federica Mogherini, ka paralajmëruar sot qeverinë turke që të mos ndërmerr hapa që do të rrezikonin rendin kushtetues, pas përpjekjes së dështuar për një grusht shtet.

“Të parët kemi thënë në natën tragjike, se institucionet legjitime duhet të mbrohen. Sot prapë e themi se sundimi i ligjit duhet të ruhet në atë vend”, ka deklaruar Mogherini para gazetarëve gjatë takimit të ministrave të jashtëm të BE-së, ku merr pjesë edhe sekretari amerikan i shtetit, John Kerry, raporton Reuters.

Aeroplani i Erdoganit ishte cak i aeroplanëve të puçistëve

Lideri turk është kthyer në Stamboll nga Marmara, ku kishte shkuar për pushime, kur të premten puçistët u përpoqën të kryejnë grusht shtet, duke bllokuar urën Bosfor në Stamboll, dhe duke “pushtuar” aeroportin dhe duke dërguar tanke pranë parlamentit turk në Ankara, transmeton Telegrafi.

“Aeroplani i Erdoganit ka qenë cak i të paktën dy aeroplanëve luftarakë të tipit F-16, derisa ai ishte duke fluturuar rrugës për në Stamboll. Aeroplani me të cilin Erdogan ishte duke udhëtuar, ka qenë nën përcjellje të dy aeroplanëve luftarakë F-16. Por pse puçistët nuk kishin qëlluar mbetet “mister”, ka deklaruar ish-oficeri ushtarak i mirinformuar për incidentin.

Hahn: Qeveria turke kishte përgatitur më herët listën e shkarkimeve të zyrtarëve

“Lista e gjyqtarëve të shkarkuar si të dyshuar për pjesëmarrje në komplot kundër qeverisë turke, pas përpjekjes së dështuar të grusht shtetit, është një shenjë se qeveria turke ka përgatitur më parë listën e të shkarkuarve”, ka deklaruar komisionari i BE-së për negociata për zgjerim Johannes Hahn.

Gazetari i CNN Turk: Janë zhdukur 42 helikopterë ushtarakë

Të paktën 42 helikopterë ushtarakë të Turqisë janë “zhdukur”, gjatë përpjekjes së dështuar për grusht shtet, thotë gazetari i televizionit CNN Turk. Gazetari i këtij televizioni Serdar Tuncer ka shkruar në Twitter, se lista e pajisjeve ushtarake e përpiluar pas tentimit të dështuar të grusht shtetit, thotë se mungojnë 42 helikopterë, duke nxitur kështu frikën se mund të vijë deri tek një përpjekje tjetër për të rrëzuar kryeministrin turk Recep Tayyip Erdogan.

Sauditët arrestojnë atasheun turk që kishte ikur në Gjermani

Atasheu ushtarak i Turqisë në Kuvajt, është arrestuar në një nga aeroportet në Arabinë Saudite në një përpjekje për të arritur në Evropë, raporton televizioni “Al-Arabia”. Raportohet se Ankaraja zyrtare, ka futur këtë diplomat ushtarak në listën e personave të kërkuar për përfshirje në organizim të grusht shtetit. Ai është arrestuar në aeroportin “Al Dammam” në lindje të Arabisë Saudite, derisa po bëhet gati të fluturojë me aeroplan për në qytetin gjerman Dusseldorf, transmeton Telegrafi.

Kurz: Rikthimi i dënimit me vdekje i papranueshëm!

Ministri i jashtëm austriak, Sebastian Kurz, ka deklaruar se do të ishte e papranueshëm që Turqia të rikthej dënimin me vdekje, pas dështimit të përpjekjes për një grusht shtet.

“Futja e dënimit me vdekjes është absolutisht i papranueshëm”, ka deklaruar Kutz në një intervistë për të përditshmen austriake “Courier”.

Ai ka shtuar se nuk guxon të ketë pastrime arbitrare ose sanksione penale jashtë sistemit të sundimit të ligjit dhe drejtësisë.

Presidenti turk Erdogan, ka deklaruar dje se është e nevojshme që menjëherë të rikthehet dënimi me vdekjes. Turqia kishte hequr dënimin me vdekje në vitin 2004.

Njësitet speciale patrullojnë nëpër rrugët e Stambollit

Në Stamboll kanë mbërritur 1.8000 pjesë të forcave speciale të policisë, të cilët janë pozicionuar në vende kyçe dhe vazhdimisht patrullojnë në rrugët e qytetit. Shefi i policisë në Stamboll, Mustafa Caliskan ka urdhëruar rrëzimin e çdo helikopteri që shfaqet në qiell pa ndonjë paralajmërim.

Erdogan urdhëron patrullimin me aeroplanë luftarakë në hapësirën ajrore të Turqisë

Presidenti turk Recep Tayyip Erdogan ka urdhëruar që aeroplanët luftarakë të forcave ajrore të patrullojnë hapësirën ajrore të Turqisë, raporton agjencia e lajmeve Anatolia.

Raportohet se qëllimi i patrullimit me aeroplanë luftarakë është se qeveria e këtij vendi është duke punuar shumë që të ofroj siguri dhe kontroll mbi hapësirën ajrore. /Telegrafi/