Ekspertja e sigurisë, Besa Kabashi-Ramaj në një intervistë të dhënë për Telegrafin ka folur për gjendjen e sigurisë në Kosovë, numrin e madh të vrasjeve dhe grabitjeve të armatosura.

Kabashi-Ramaj është deklaruar edhe rreth qasjes së subjekteve politike ndaj armëmbajtjes pa leje dhe krimit ordiner.

“Asnjëra nga partitë politike nuk ka treguar maturi që me u ul edhe me përgatit një platformë. Ne e dimë se ende nuk kanë paraqitur asnjë platformë formale se çka duan me iu premtu qytetarëve që kanë me realizu në këmbim të taksave të tyre, e mos të flasim për platformë të sigurisë. Ja vlen me u përmend se partitë politike që nga  pas lufta nuk kanë pasur platformë të sigurisë. E, përmendin ushtrinë dhe policinë duke injoruar apo duke mos qenë të vetëdijshëm se siguria është shumë më e gjerë , sepse siguria prek fenomenet të cilat ndikojnë në mënyrë më direkte në gjendjen e një qytetari që jeton në Kosovë”, ka thënë ajo.

Ajo ka komentuar edhe rastet kur politikanët kanë gjuajtur me armë në hapësira publike.

“Të zgjedhurit politikë nuk e shohin se janë përgjegjës edhe për modelin që japin të tjerët, është shembull i keq gjuajtja me armë. Nuk mundesh gjatë ditës që të promovosh sistemin funksional të drejtësisë dhe në mbrëmje të përfshihesh në afera korruptive “, tha ajo.

Ekspertja e sigurisë, Besa Kabashi-Ramaj gjatë intervistës për Telegrafin

Kurse sa i përket proceseve zgjedhore, të cilat deri tani kanë kaluar të qeta, ajo tha se kjo ka ndodhur për shkak se gjërat janë mbajtur nën kontroll.

Ndër të tjera, Kabashi-Ramaj foli edhe për gjuhën e ashpër  dhe përleshjet fizike nga politikanët para zgjedhjeve, dhe ndikimin që mund ta këtë në ditën e zgjedhjeve.

“Shembull i keq,  qytetarët duhet të kuptojnë së përleshjet nuk po ndodhin për ta por për interesa të tyre, diskutimet zgjedhore nuk kanë të bëjnë se kush po ofron zgjidhje më të mira për qytetarët por janë të përqendrua në interesat e tyre”, ka thënë ajo.

Kabashi-Ramaj gjatë intervistës ka folur edhe për faktorët të cilët ndikojnë që numri i vrasjeve dhe grabitjeve të armatosura të jetë i lartë. Ajo ka thënë se përgjegjësinë kryesore për numrin e këtyre vrasjeve duhet ta kenë institucionet./Telegrafi/