Edhe sot protestë në Graçanicë, policia paralajmëron bllokimin e rrugës Prishtinë-Gjilan

Policia e Kosovës ka njoftuar se me qëllim të mbarëvajtjes së protestës së paralajmëruar, që do të mbahet sot në Graçanicë duke filluar nga ora 11:30 e deri në përfundim të protestës, do të ridrejtoj trafikun për automjetet që qarkullojnë nga Prishtina në Gjilan dhe anasjelltas, pasi që rruga kryesore në Graçanicë nuk do të jetë e qarkullueshme për trafik deri në përfundim të protestës.

Sipas një njoftimi të Policë së Kosovës, bëhet e ditur se për të përballuar sa më lehtë rrethanat që do të paraqiten në qarkullimin rrugor, policia kërkon ndihmën dhe mirëkuptimin e të gjithë pjesëmarrësve në trafik që përgjatë kohës sa do të zgjatë protesta të shfrytëzojnë rrugët alternative.

Ndryshe, edhe të enjten me pankartat “Të lirohen serbët tonë të pafajshëm”, “Drejtësi për popullin serb”, “Mos i kriminalizoni serbët”, qytetarët serbë protestuan para Stacionit të Policisë në Komunën e Graçanicës.

Ata kërkuan lirimin e Dragisha Milenkoviq, i cili është arrestuar nga policia gjatë së mërkurës.

Ndryshe, Dragisha Milenkoviq dyshohet se si gardian i burgut në Prishtinë dhe në paralelen e ndarë nga Prishtina konkretisht në burgun e Lipjanit, në mënyrë sistematike, dyshohet se ka ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën ndaj të burgosurve shqiptarë.

Zyrtarët policorë kanë zbatuar kontroll në shtëpinë e të dyshuarit dhe në cilësinë e provave materiale kanë sekuestruar një armë zjarri-revole e tipit “Zastava” cal.9mm, 136 fishek të kalibrit 9x19mm, thikë ushtarake e tipit SOG Speciality Knives, shufër metalike “Taiëan”, dokumente, vendime, notes dhe telefon personal.

Ministri i Punëve të Brendshme, Xhelal Sveçla, ka thënë se përgjegjësit e krimeve të luftës në Kosovë duhet të vihen para drejtësisë.

Sveçla ka thënë se arrestimi i Milenkoviq ka ndodhur pas një punë të gjatë hetimore, nga e cila janë mbledhur prova të mjaftueshme për ekzistimin e dyshimit për pjesëmarrje në krimet gjatë kohës së luftës. /Telegrafi/