Edhe një tjetër vdekje misterioze, kreu i kompanisë më të madhe ruse të IT-së gjendet pa shenja jete në zyrën e tij

Një biznesmen rus me lidhje me shërbimet e sigurisë ruse është i fundit në një varg figurash të profilit të lartë në vend, që u gjet i vdekur në rrethana të pashpjegueshme.

Anton Andreyevich Cherepenikov, 40 vjeç, ishte kreu i kompanisë më të madhe ruse të IT, ICS Holding, që u gjet i vdekur në zyrën e tij në Moskë, transmeton Telegrafi.

Sipas mediave ruse, shkaku paraprak i vdekjes ishte arresti kardiak, por miku i tij Vasiliy Polonsky tha se nuk i besonte raportet zyrtare të vdekjes së tij, raportoi media e pavarur ruse Baza.

Lexo po ashtu Ushtria ukrainase arrin të futet në rajonet që kontrolloheshin nga rusët në afërsi të Bakhmutit

“Shkaku i saktë i vdekjes së sipërmarrësit do të përcaktohet më vonë”, njoftojnë mediat.

The Times raporton se shkaku zyrtar i vdekjes është një mbidozë e gazit mjekësor.

ICS Holding është përdorur nga Shërbimi Federal i Sigurisë i Rusisë (FSB) për të monitoruar aktivitetet e qytetarëve në internet, sipas gazetës së pavarur ruse Novaya Gazeta.

Ata njoftuan se kompanisë iu dha detyra për të kryer mbikëqyrjen e qytetarëve pas ligjit të futur në vitin 2018, i cili forcoi mbikëqyrjen e shërbimeve ruse të sigurisë mbi qytetarët e saj.

Lexo po ashtu Luftëtarët e Wagner në Bjellorusi nuk kanë forcat e nevojshme për të nisur ndonjë ofensivë – imazhet e reja satelitore e dëshmojnë këtë

Ky ligj u lejon operatorëve të telekomit të ruajnë regjistrimet audio të të gjitha thirrjeve dhe SMS-ve për gjashtë muaj, dhe trafikun e internetit për një muaj.

ICS Holding hyri në listën e kompanive nën sanksione ndërkombëtare pas pushtimit rus të Ukrainës.

Cherepenikov ishte një partner i gjatë i oligarkut Alisher Usmanov, i cili ishte gjithashtu një nga ata të sanksionuar për lidhjet e tij me presidentin rus Vladimir Putin.

Ai ishte anëtar i bordit të USM, një grup i fuqishëm biznesi rus, si dhe operatorëve celularë Megafon dhe USM Telecom, të cilat Usmanov i kontrollon, raporton Novaya Gazeta.

Lexo po ashtu "Do të ketë shumë të tjerë”: Ministri ukrainas merr përgjegjësinë për sulmet me dronë në Moskë dhe gadishullin e Krimesë

Përveç Cherepenikov, një tjetër miliarder rus u gjet i vdekur gjatë fundjavës, por ai besohet se ka vdekur nga shkaqe natyrore.

Igor Kudryakov, një ish-zyrtar qeveritar dhe biznesmen i pasur, u gjet i vdekur në banesën e tij në Moskë. Sipas raportimeve, Kudryakov është diagnostikuar me kancer dhe sëmundja thuhet se ka përparuar në një fazë terminale.

Cherepenikov është i fundit në një seri oligarkësh rusë që u gjetën të vdekur në rrethana të pashpjegueshme pas pushtimit të Ukrainës. /Telegrafi/