E thotë edhe Kremlini: Rrëzimi i aeroplanit që vrau Prigozhinin mund të ketë qenë ’i qëllimshëm’

Hetuesit rusë po shikojnë mundësinë që aeroplani privat që mbante shefin e mercenarëve të Wagner, Yevgeny Prigozhin, të ishte rrëzuar qëllimisht, tha Kremlini të mërkurën.

Sipas mediave të huaja, përcjell Telegrafi, komenti shënoi herën e parë që regjimi i presidentit Vladimir Putin pranoi publikisht se kryekomandanti i luftës mund të ishte vrarë.

Duke folur me gazetarët gjatë konferencës së tij të përditshme, zëdhënësi i Kremlinit, Dmitry Peskov theksoi se “versione të ndryshme” të asaj që ndodhi në qiejt mbi rajonin Tver ekzistojnë dhe po hetohen.

“Është e qartë se po shqyrtohen versione të ndryshme, duke përfshirë versionin – ju e dini se për çfarë po flasim – le të themi, një keqbërje e qëllimshme”, u tha Peskov gazetarëve kur u pyet për rastin.

Kremlini u bëri thirrje gazetarëve të prisnin derisa të përfundojë hetimi nga Komiteti Hetues Rus – dhe përjashtoi mundësinë e një hetimi ndërkombëtar për rrëzimin.

“Le të presim rezultatet e hetimit tonë rus”, ka thënë më tej Peskov.

Aeroplani brazilian Embraer me të cilin Prigozhin po udhëtonte nga Moska për në Shën Petersburg u rrëzua pranë një fshati në rajonin e Tverit më 23 gusht, duke vrarë të 10 personat në bord, duke përfshirë udhëheqësin e Grupit Wagner.

Rusia që atëherë ka informuar autoritetin e hetimit të Brazilit se nuk do të hetojë rrëzimin sipas rregullave ndërkombëtare “për momentin”, tha agjencia braziliane.

Ndryshe, fshatarët pranë skenës së përplasjes i kanë thënë Reuters se dëgjuan një zhurmë dhe më pas panë aeroplanin të rrëzohej në tokë.

Ndërsa një vlerësim paraprak i inteligjencës amerikane arriti në përfundimin se një shpërthim i qëllimshëm në bordin e aeroplanit shkaktoi fatkeqësinë.

Incidenti erdhi dy muaj pas ditës pasi Prigozhin nisi një rebelim jetëshkurtër që synonte përmbysjen e pushtetit më të lartë ushtarak të Rusisë, gjë që e shtyu Putinin ta etiketonte publikisht atë si “tradhtar” – përpara se të binte dakord me nxitim për një armëpushim me shefin mercenar.

Një ditë pas rrëzimit, Putin u dërgoi ngushëllimet e tij familjeve të të vrarëve dhe vlerësoi Prigozhin, 62 vjeç, si një “biznesmen të talentuar” të cilin e kishte njohur që nga fillimi i viteve 1990.

Udhëheqësi rus nuk mori pjesë në funeralin privat të Prigozhin që u zhvillua në një varrezë në periferi të Shën Petersburg të martën. /Telegrafi/