Durmishi: Kemi shpallur tenderin e ri për mirëmbajtjen e rrugëve, buxhetit të vendit ia shpëtuam rreth 22 milionë euro

Zëvendësministri i Mjedisit, Planifikimit Hapësinor dhe Infrastrukturës, Hysen Durmishi ka njoftuar se është shpallur tenderi i ri për mirëmbajtjen e rrugëve.

Në një konferencë për medie, Durmishi thotë se me këtë projekt i janë shpëtuar buxhetit të Kosovës rreth 22 milionë euro.

“Siç jeni të informuar edhe në konferencën e kaluar, ne kemi anuluar tenderin për mirëmbajtjen verore të rrugëve nacionale dhe rajonale të Kosovës për vitet 2021-2024. Vlera e parashikuar e këtij projekti ishte 44 milionë euro. Kjo kontratë ishte marrëveshje kornizë, e cila lejonte menaxherin e kontratës ta rriste vlerën e saj deri në 30 për qind. Në fakt ky 44 milionësh bëhej 57 milionë euro”, tha Durmishi, përcjell Telegrafi.

Ai tha se hapja e ofertave për këtë tender do të jetë në fund të muajit.

“Në fund të javës së kaluar ne kemi shpallur tenderin e ri, duke e ndryshuar edhe si koncept. Hapja e ofertave do të bëhet më 31 maj. Kontrata do të jetë një vjeçare. Vlera e parashikuar në këtë kontratë është 11 milionë e 669 mijë euro. Nëse i llogarisim për tri vitet e ardhshme, ne do të shpenzojmë maksimalisht 35 milionë euro. Vetëm nga kjo kontratë, buxhetit të Kosovës ia shpëtuam rreth 22 milionë euro”, shtoi ai.

Durmishi tregon se MMPHI ka marr vendim që t’i anuloj të gjitha memorandumet e nënshkruara me komunat gjatë vitit 2021.

“Ne kemi marr vendim që të gjitha memorandumet me komunat që janë nënshkruar gjatë vitit 2021. Këto memorandume janë nënshkruar pa u analizuar mirë dhe duke pasur parasysh që jemi në kohë pandemie, rrezikojmë që të mos kemi mjete për realizimin e tyre. Vetëm në muajt janar-mars janë nënshkruar memorandume me vlerë prej 18.5 milionë euro”, përfundon Durmishi. /Telegrafi/