Shtëpia Botuese “Dukagjini” promovon librin e Jürgen Habermas – “Transformimi i ri i sferës publike dhe politika deliberative”

Në një botë ku sfera publike po evoluon vazhdimisht, lundrimi në kompleksitetin e politikës moderne kërkon udhëzime të thella.

Shtëpia Botuese “Dukagjini”, e njohur për përkushtimin e saj ndaj rritjes intelektuale, ka botuar të përkthyer veprën e njohur të Jürgen Habermas, “Transformimi i ri i sferës publike dhe politika deliberative”.

Ky libër, i përkthyer me mjeshtëri në gjuhën shqipe nga Blertë Ismajli, profesoreshë e gjermanishtes në Fakultetin Filologjik, thellohet në thelbin e ligjërimit demokratik. Kurse, panairi i 23-të i librit në Prishtinë shërbeu si platformë e përkryer për të shpalosur këtë libër teorik para publikut shqipfolës.

Gjatë promovimit të shumëpritur të librit, Shtëpia Botuese “Dukagjini” organizoi një panel diskutimi që nxiti mendime ku morën pjesë studiues të nderuar Bekim Baliqi, profesor i shkencave politike në Fakultetin Filozofik dhe Ag Apolloni, profesor i letërsisë në Fakultetin Filologjik.

Prania e këtyre ekspertëve, krahas vetë përkthyeses, i shtoi thellësi dhe depërtim përmbajtjes tashmë pasuruese të librit të Habermas.

Profesoresha, Blertë Ismajli, në një intervistë për Telegrafin theksoi sfidat të cilat janë hasur gjatë përkthimit të një libri të tillë filozofik.

“Sfidat që dalin te tekstet e tilla zakonisht ndërlidhen me konceptet që përdoren në këto tekste edhe sfida është që të pështaten sa më mirë në gjuhën shqipe duke pasur parasysh kontekstin në të cilin janë përdorur në gjuhën gjermane.

“Natyrisht këtu duhet të kemi parasysh se teksti është shkruar në një gjuhë me një traditë shumë të madhe shkrimi filozofik dhe ka qenë e vështirë shpesh herë që të përcaktohemi për terma që duhen përdorur në gjuhën shqipe në mënyrë që këto të jenë sa më të kapshme për lexuesin në gjuhën shqipe.”

“Sfidë tjetër ka qenë stili jashtëzakonisht i vështirë në të cilin shkruan Jürgen Habermas, është një stil akademik ndonjëherë shumë kompleks dhe ka qenë i vështrië që të ruhet ky kompleksitet pastaj edhe në gjuhën shqipe”, tha ajo për Telegrafin.

Ismajli ka shtuar se fokusi kryesor i librit është në procesin e formimit të opinionit publik. Për Telegrafin ajo theksoi se një libër i tillë do të gjejë mjaft lexues.

“Libri merret me proceset e formimit të opinionit publik dhe të vullnetit në një shoqëri dhe mendoj që në çdo shoqëri demokratike këto janë tema që janë shumë të rëndësishme sepse shpjegojnë mënyrën se si funksionojnë shoqëritë në një demokraci. Prandaj mendoj se do të ketë mjaftueshëm lexues, qoftë nga socilogët, qoftë nga proefeisonistët e shkencave politike, shkencave të komunikimit sepse merret edhe me këtë çështje – komunikimin në epokën e mediave socaile, kështu që besoj që do të ketë mjaft të interesuar”, shtoi profesoresha.

Jürgen Habermas, një filozof i shquar, është nderuar prej kohësh për analizën e tij të thellë të sferës publike dhe transformimin e saj me kalimin e kohës. Në librin “Transformimi i ri i sferës publike dhe politika deliberative”, ai ofron një shqyrtim gjithëpërfshirës të ndërveprimit kompleks midis komunikimit, pushtetit dhe proceseve demokratike.

Habermas argumenton se sfera publike, dikur e karakterizuar nga diskursi racional dhe politika pjesëmarrëse, ka pësuar ndryshime të rëndësishme për shkak të rritjes së masmedias, globalizimit dhe komercializimit. Ai i zbërthen me përpikëri këto transformime, duke hedhur dritë mbi sfidat që ato paraqesin për shoqëritë demokratike. Nëpërmjet analizës së tij të përpiktë, Habermas paraqet një rast bindës për rigjallërimin e sferës publike dhe përforcimin e politikës deliberative si bazë për një demokraci të lulëzuar.

Vetë profesoresha , Blertë Ismajli, potencoi një libër i tillë do të jetë i dobishëm për të gjithë, përfshirë studiuesit, por dhe vetë protagonistët e debateve.

“Libri është libër teorik që merret me vetë procesin se si krijohen opinionet publike dhe në këtë kuptim ndoshta do të jetë më i dobishëm për ata që merren me analiza të tilla, sesa me vetë ata që e bëjnë debatin publik te ne. Por, sido që të jetë konsideroj se është me rëndësi për të gjithë, edhe për ata që janë shumë aktiv në debatet politike në Kosovë”, tha Ismajli në një intervistë për Telegrafin.

Me këtë libër shtëpia botuese “Dukagjini” ka rinis kolanën “Fryma”, e cila synon ta pasurojë jetën kulturore dhe të nxisë debat intelektual në shoqëri, duke sjellë në gjuhën shqipe autorët më me ndikim në histori dhe që kanë lënë gjurmë të pashlyeshme në traditën e mendimit. është libri i parë që e rihap siparin e kësaj kolane.

Ky libër është sa i pashmangshëm, aq edhe i domosdoshëm për të gjitha shoqëritë, e veçanërisht ato të cilat dëshpërimisht përpiqen për konsolidim të rendit demokratik dhe krijimit të një sfere publike gjithëpërfshirëse, e cila fton për konkurrencë opinionesh e botëkuptimesh duke iu referuar arsyes, si të vetmit arbitër epistemik.

Pa kontributet teorike të Habermasit jo vetëm tradita e mendimit perëndimor, por edhe kultura politike e demokratike e shoqërive perëndimore, në përgjithësi, do të ishin ndjeshëm më të varfra.

Ky libër është shkruar në gjermanisht në vitin 2022, ndërsa ende nuk është përkthyer në anglisht.