Dua Lipa dhe babai i saj folësit kryesor të “Future Forum”, e promovojnë Kosovën përmes festivalit ‘Sunny Hill’

Konferenca Ndërkombëtare e Muzikës Live (ILMC) në pjesën e ‘Future Forum’ – një aktivitet për profesionistët e rinj të muzikës live, që zhvillohet si pjesë e kësaj konference tre-ditore që njëkohësisht është edhe konferenca më e madhe e këtij lloji në botë, e ka paralajmëruar fituesen e dyfishtë të Grammy Awards, Dua Lipën dhe babain e saj Dukagjin Lipen, si folësit kryesor të këtij viti.

Future Forum do të ketë Dua Lipën dhe babain e saj, Dukagjin Lipën, të intervistuar nga redaktori i IQ Magazine Gordon Masson, rreth rolit kryesor që muzika ‘live’ ka luajtur në zhvillimin e karrierës së Duës, rolin e Dukagjinit në ndërtimin e karrierës së saj, vështirësitë e udhëtimeve të shpeshta dhe Fondacionin dhe Festivalin Sunny Hill në Kosovë.

Fondacioni Sunny Hill është një organizatë bamirësie, e themeluar në 2016 në Prishtinë, nën patronazhin e Dua Lipa’s. Misioni i organizatës është përkrahja e grupeve në nevojë, forcimin e vlerave demokratike, zvogëlimin e varfërisë, promovimin e bashkëpunimit ndërkombëtar, dhe avancimin e arritjeve njerëzore.

Future Forum do të jetë edhe platforma më e madhe promovuese e shtetit të Kosovës përmes festivalit më të madh në Europen Juglindore, që vitin e kaluar është organizuar nga Dukagjin Lipa dhe agjensioni i marketingut REPUBLIKA në Prishtinë, i cili poashtu është themeluar nga Dukagjin Lipa.

Prishtina dhe Kosova për tre netët e festivalit Sunny Hill ishte në qender të vëmendjes së botës sa i perkët muzikës, falë pjesëmarrjes së performuesve të nivelit më të lartë botëror.

Dua Lipa, Action Bronson dhe Martin Garrix ishin performuesit kryesor të tri netëve të festivalit, që vendin tonë e vendosën në hartën e muzikës botërore.

Festivalet e tilla në rajonin tonë (Exit nga Serbia dhe Ultra nga Kroacia) kanë mbëshjtetje enorme dhe shumëvjeçare nga qeveritë e tyre dhe paraqesin metodën më të mirë të mundshme të promovimit të shteteve të tyre.

Dukagjin Lipa dhe Dua Lipa e shfrytëzojnë çdo moment për promovimin e vendit tonë sikurse përmes intervistave të shumta të Dua Lipës po ashtu edhe me angazhimin maksimal të Dukagjin Lipës me Sunny Hill Festival.

Megjithatë, ky aktivitet duhet të mbështetet fuqishëm nga institucionet e Kosovës, në mënyrë që të lehtësohet puna e organizatoreve dhe krijohen mundësitë sa më të mëdha për zhvillimin sa më të madh të këtij festivali, i cili është përfaqësuesi më i mirë i vlerave dhe vendit tonë në përgjithësi.

Dua Lipa vitin e kaluar arriti kulmet e listave muzikore, për t’u bërë femra e parë në Mbretërinë e Bashkuar që ka marrë më shumë se një miliard dëgjime në Spotify me hitin e saj ‘New Rules’.

Dua gjithashtu ishte në krye të listave në nivel global, dhe së fundi morri çmimet prestigjioze Grammy Awards 2019 për kategorinë “Best New Artist” dhe “Best Dance”, duke u bërë artistja e tretë britanike – pas Adele dhe Amy Winehouse – për të marrë dy çmime Grammy. Dua Lipa poashtu ka fituar tre çmime Brit Awards si dhe shumë çmime tjera të industrisë. /Telegrafi/