Dronët Bayraktar kurrë nuk do t’i shiten Rusisë

Drejtori i përgjithshëm i kompanisë turke Baykar, e cila prodhon dronët ushtarakë Bajraktar, Haluk Bayraktar, tha se kjo kompani nuk do t’i shesë kurrë dronë Rusisë, sepse ata mbështesin sovranitetin dhe rezistencën e Ukrainës.

“Ne jemi shumë krenarë dhe është shumë prekëse për ne që jemi një nga simbolet e rezistencës së madhe në Ukrainë”, u përgjigj Bajraktar kur u pyet se si ndihet të tërheqësh kaq shumë vëmendje në mbarë botën.

Një nga arsyet pse droni Bayraktar u bë një nga simbolet e Ukrainës së lirë dhe sovrane është se e gjithë flota e dronëve Bayraktar TB 2 ishte aktive që në ditën e parë të luftës. Ai vlerësoi gjithashtu operatorët ukrainas të dronëve, për të cilët tha se janë shumë të kualifikuar dhe të aftë për të operuar në të gjitha mjediset.

“Ne kemi ndërtuar një model marrëdhëniesh të favorshme me Ukrainën. Është një marrëdhënie plotësuese midis dy vendeve”, theksoi Bajraktar marrëdhëniet strategjike midis Ukrainës dhe Turqisë dhe faktin se në to janë investuar vite përpjekjesh.

I pyetur nëse do të konsideronin shitjen e dronëve të tyre në Rusi, Bayraktar tha se nuk do ta bënin kurrë një gjë të tillë sepse mbështesin sovranitetin dhe rezistencën e Ukrainës.

Duke komentuar fushatat që po zhvillohen në disa vende me qëllim të grumbullimit të parave për blerjen e dronëve për Ukrainën, Bajraktar tha se është prekur nga fakti që këta dronë po i dhurohen Ukrainës.

“Si kompani duam të tregojmë se në situata si kjo, një luftë e madhe, ne nuk shkojmë pas maksimizimit të të ardhurave dhe fitimeve tona, por ne maksimizojmë mbështetjen tonë për Ukrainën dhe luftën e saj për pavarësi”, tha Bazraktar. Ai tha se po luten për një zgjidhje të drejtë dhe paqe të qëndrueshme. /Telegrafi/