Drenasi me kryetar të dorëhequr, priten zgjedhje të reja

Pa u bërë 24 orë nga vendimi i Gjykatës së Apelit e cila i konfirmon dënimin e shkallës së parë me anë së cilës dënohet me tri vjet burg, kryetari i deritanishëm i Drenasit Nexhat Demaku doli në një konferencë për media.

Para ndërtesës së komunës në të cilën ishte kryetar për gati shtatë vjet, tashmë ish-kryetari Demaku e bëri publike edhe zyrtarisht dorëheqjen e tij nga ky post.

Ai tha se vendimi i gjykatës nuk ka të bëjë me të si kryetar dhe me punën e tij gjatë kësaj periudhe.

“Sigurisht që ky vendim edhe i gjykatës por edhe vendimi që po e marrim sot nuk ka të bëjë me punën time si kryetar i komunës por ka të bëjë me një periudhë shumë të rëndësishme, një periudhë të lavdishme por jo vetëm për jetën tonë por ë gjithë Kosovën deh gjithë popullin e Kosovës”, ka thënë Demaku.

Vendimin e Gjykatës ai e quajti absurd ndërsa tha se ata që duhet ta thonë të vërtetën e thanë të pavërtetën, gjë që sipas tij është një e keqe më e madhe se vet procesi.

Duke i falënderuar të gjithë qytetarët e Drenasit për mbështetje, Demaku tha se ndihet keq që nuk mundi të bëjë më shumë për qytetaret e tij.

Ish kryetari i Drenasit tha se do t’i shfrytëzojë të gjitha mundësitë ligjore duke iu drejtuar Gjykatës Supreme për ligjshmërinë e vendimit si dhe tha se do të kërkoj pezullimin e ekzekutimit të vendimit deri në vendimin e Gjykatës Supreme. /Telegrafi/