Dogana e Kosovës pranon donacion nga Britania e Madhe

Në kuadër të përpjekjeve të përbashkëta në luftimin e krimit të organizuar dhe kontrabandës, drejtori i përgjithshëm i Doganës së Kosovës, Bahri Berisha me bashkëpunëtorë ka pritur në vizitë përfaqësuesit e Doganës së Britanisë së Madhe, Andrew Pavlinic, shef për Inteligjencën Ndërkombëtare dhe AndyLawson, drejtues në të njëjtin departament.

“Në këtë takim u prezantua një donacion i pajisjeve për forenzikë digjitale, i dhënë Doganës së Kosovës, me qëllim të përmirësimit të kapaciteteve që ndihmojnë në luftimin e krimit të organizuar dhe kontrabandës. Këto pajisje janë moderne dhe versioni më i fundit i pajisjeve të këtij lloji, andaj në kohën e teknologjisë së avancuar, këto pajisje do të jenë ndihmesë e madhe për Doganën e Kosovës në sigurimin e provave dhe informatave të besueshme për proceset hetimore dhe gjyqësore”, thuhet në njoftimin e Doganës.

Drejtori i përgjithshëm theksoj se “Dogana e Mbretërisë së Bashkuar gjithmonë ka qëndruar afër doganës sonë prandaj edhe jemi thellësisht falënderuar për asistencën që nga themelimi i doganës e deri tani, gjithmonë kemi pasur një mbështetje nga Dogana e Mbretërisë së Bashkuar gjë për të cilën jemi falënderues”. /Telegrafi/