Deputeti Agusholli kërkon që Kosova ta shpallë non grata deputetin ekstremist francez që vazhdimisht ofendon UÇK-në e shqiptarët

Politikani francez i të djathtës ekstreme Nicolas Bay, që është njëherësh deputet në Parlamentin Evropian, sërish ka ofenduar ish-Ushtrinë Çlirimtare të Kosovës (UÇK).

Bay i cili ditë më parë ka vizituar kishat ortodokse serbe dhe ka takuar komunitetin serb në Kosovë, UÇK-në e quan terroriste.

“Përballë heshtjes për situatën në Kosovë dhe marrjes së këtij territori nga terroristët e UÇK-së, desha të shkoj atje për të paralajmëruar për fatin e të krishterëve serbë. Mund të mos mjaftojë vendosmëria e jashtëzakonshme e popullit serb, t’i ndihmojmë”, ka thënë ekstremisti francez.

Po ashtu, Bay gjatë takimit me klerikun Sava Janiq në Manastirin e Deçanit ka thënë se prezenca e murgjërve serbë aty është më se tetë shekuj.

Pas deklaratave të tij, kanë ardhur reagimet e shumta nga politikanë, ekspertë të sigurisë dhe përfaqësues të shoqërisë civile.

Së fundi deputeti i LVV-së, Gramos Agusholli, ka kërkuar që Nicolas Bay të shpallet non grata nga Republika e Kosovës.

“Hiç më pak se non grata për ket’ fashist”.

Kur e lexova këtë deklaratë mendova se e kanë bërë popat e Kishës Serbe, të cilët i bekonin ushtarët serbë kur niseshin për të bërë masakra mbi shqiptarët e Kosovës dhe boshnjakët në Srebrenicë”, shkroi Agusholli në Facebook.

Ish-ministri i Punëve të Jashtme, Petrit Selimi ka thënë se deklarata e Bayit është raciste e llojit të Vladimir Putinit dhe Sllobodan Millosheviqit.

“Çfarë deklararë absurde, një gënjeshtër dhe një qëndrim racist. Me siguri Prizreni është evropian, por ti Nicolas sigurisht që nuk jeni. Ju i përkisni botës Putiniste, Millosheviqiane të errësirës dhe vdekjes. Shkoni dhe kërkoni falje në Katedralen të Shën Nënë Terezës, shenjtores shqiptare”, thuhet në reagimin e Selimi.

Ndërkaq, deputetit Bay i është ndaluar nga Parlamenti Evropian që të bëjë udhëtime zyrtare për monitorimin e zgjedhjeve, pasi ai mori pjesë në disa misione në Rusi në prag të agresionit ushtarak rus në Ukrainë./Telegrafi/

Face au silence sur le situation au Kosovo et la prise de pouvoir sur ce territoire par les terroristes de l’UCK, je tenais à me rendre sur place pour alerter sur le sort des chrétiens serbes.

L’extraordinaire détermination du peuple serbe ne suffira peut-être pas : aidons-les ! pic.twitter.com/yFrPARAFOs

— Nicolas Bay (@NicolasBay_) October 31, 2022